Раисҷумҳури Амрико Доналд Трамп пас аз эълони коҳиши ҳузури низомии кишвараш дар Аврупо, дирӯз изҳор дошт, ки қасд дорад 5 ҳазор сарбози иловагиро ба Лаҳистон (Полша) эъзом кунад. Ин тасмим нигарониҳоро дар мавриди ояндаи амнияти Аврупо бештар кардааст.
Трамп ин тасмимро дар саҳифаи ҷамъиятии худ дар “Truth Social” нашр кардааст. Тибқи гузориши расонаҳои амрикоӣ, қарор дар бораи фиристодани нерӯҳои иловагӣ ба Лаҳистон чанде пас аз изҳороти қаблии Пентагон садо дод, ки дар он гуфта мешуд интиқоли як дастаи низомии зиреҳпӯши амрикоӣ ба ин кишвар муваққатан қатъ шудааст.
Манбаъҳо менависанд, ки вазири дифои ИМА Пит Ҳегсет қаблан аз муттаҳидони аврупоӣ интиқод карда, изҳор дошта буд, ки онҳо дар лаҳзаҳои зарурӣ ба таври кофӣ дар канори Вашингтон қарор надоштанд.
Ин тасмим дар ҳоле садо медиҳад, ки аввали ҳамин моҳ Доналд Трамп дар пайи як баҳси лафзӣ бо садриаъзами Олмон Фридрих Мертз таҳдид карда буд, ки 5 ҳазор сарбози амрикоиро аз Олмон берун хоҳад кард. Дар иваз, Трамп мегӯяд, ки ба далели муносибатҳои хуби шахсиаш бо президенти ростгарои Лаҳистон Карол Навротский — ки ӯро “дӯсти азиз”-аш номид — нерӯҳои иловагияшро ба Лаҳистон мефиристад.
Ҳоло маълум нест, ки оё сарбозони нав аз нерӯҳои мавҷуда дар дигар кишварҳои аврупоӣ интиқол меёбанд ё ИМА воқеан ҳузури низомии худро дар ин қитъа афзоиш медиҳад.
Таҳлилгарони сиёсӣ бар ин боваранд, ки ин гуна қарорҳои ногаҳонӣ ва якҷонибаи ҳукумати кунунии Амрико обрӯ ва эътибори ин кишварро дар миёни муттаҳидони аврупоиаш ба шиддат коҳиш медиҳад. Ин тағйири мавзеъҳои пайваста кишварҳои аврупоиро дар робита ба амнияти минтақа, муноқишаҳои ҷаҳонӣ ва ҷанги Украина дар ҳолати саргардонӣ боқӣ мегузорад.
Ба гуфтаи коршиносон, ҳанӯз мушаххас нест, ки ин сиёсати эҷоди муноқишаҳо бо дӯстону душманон як қисми стратегияи дарозмуддати ИМА аст ё танҳо аз хоҳишҳои шахсии ҳокимони имрӯзаи Вашингтон сарчашма мегирад.
