Президенти Иёлоти Муттаҳидаи Амрико Доналд Трамп рӯзи 2-юми август дар сафҳаи худ дар шабакаи иҷтимоии Truth Social навишт, ки Вашингтон тасмим гирифтааст ҳамлаи банақшагирифташуда алайҳи Эронро ба таъхир андозад ва ба музокирот имконият диҳад.
Ба гуфтаи Трамп, ҳамлае мавриди баррасӣ қарор дошт, ки дар сурати иҷро шуданаш метавонист ба яке аз бузургтарин амалиётҳои низомии ИМА аз замони Ҷанги дуюми ҷаҳон табдил ёбад. Ӯ афзуд, ки чанд кишвари минтақа аз Вашингтон дархост карданд, то аз истифодаи нерӯи низомӣ худдорӣ карда, роҳи дипломатияро пеш гирад.
Трамп ҳамчунин хабар дод, ки музокироти нав байни намояндагони Иёлоти Муттаҳида ва Ҷумҳурии исломии Эрон пас аз ин изҳорот оғоз хоҳад шуд. Ба гуфтаи ӯ, ҳадафи асосии гуфтушунидҳо коҳиши танишҳо ва пайдо кардани роҳи ҳалли масъалаҳои мавҷуда, аз ҷумла барномаи ҳастаии Эрон мебошад.
То ҳанӯз мақомоти Эрон ин иддаои Трампро дар бораи омодагии чунин ҳамла тасдиқ накардаанд. Бо вуҷуди ин, Теҳрон ҳам мегӯяд, барои ҳалли низоъҳо аз роҳи дипломатӣ истиқбол мекунад, аммо дар сурати ҳар гуна ҳамла ба кишвараш посух хоҳад дод.
Изҳороти Трамп дар шароите садо дод, ки ҷомеаи ҷаҳонӣ бо нигаронӣ таҳаввулоти муносибатҳои ИМА ва Эронро пайгирӣ мекунад ва бисёре аз кишварҳо ба идомаи музокирот ҳамчун роҳи пешгирӣ аз шиддат гирифтани вазъ умед мебанданд.
