Ҳудуди 237 шаҳрванди Тоҷикистон, ки бинобар баста будани марзҳо дар гузаргоҳи «Жибек Жоли»-и байни сарҳади давлатии Ҷумҳурии Қазоқистон ва Ҷумҳурии Ӯзбекистон муваққатан дармонда буданд, шоми 2-уми июни соли ҷорӣ ба Ватан баргардонида шуданд.
Дар бораи ба куҷо овардани шаҳрвандон ва айни замон дар куҷо ҳузур доштани онҳо маълумот дода намешавад. Тибқи маълумоти шабакаи телевизионии «Astana-tv», тоҷикистониён беш аз ду моҳ дар сарҳади байни Қазоқистону Ӯзбекистон дармонда, бо сабаби карантин ба Ватан омада натавонистанд.
Охири моҳи март ВКХ Тоҷикистон хабар дода буд, ки дар ҳамкорӣ бо ҷонибҳои Ӯзбекистон ва Қазоқистон ва талошҳои намояндагиҳои дипломатӣ ва консулии кишвар дар Тошканд, Нур-Султон ва Алмато барои аз тариқи долони нақлиётии автомобилӣ ба Ватан баргардонидани беш аз 1100 нафар шаҳрванди кишвар, ки дар гузаргоҳҳои сарҳадии кишварҳои ҳамсоя дармонда буданд, мусоидат сурат гирифт. Он замон Вазорат аз шаҳрвандон дархост намуда буд, ки бо дарназардошти вазъи бавуҷудомада, ба қадри имкон ҷойи зисти доимӣ ё муваққатии худро тарк накунанд. Сафорати Тоҷикистон дар Маскав низ аз шаҳрвандон даъват карда буд, ки ба маълумоти шубҳанок ва носанҷида бовар накунанд ва аз сафар ба самти Тоҷикистон тавассути нақлиёти заминӣ мисли (автобус, таксӣ ва ҳар гуна мошинҳои дигар) худдорӣ кунанд.
Дар шабакаҳои иҷтимоӣ шаҳрвандони бандмонда борҳо аз вазъи бади худашон шикоят карда, аксу наворҳоеро ҳам гузошта буданд. Дар аксҳо дида мешуд, ки занону кӯдакони тоҷик ҳам онҷо ҳузур доранд ва рахти хоби бархеи онҳо аз картон иборта буд.
Коршиносон бо таваҷҷӯҳи даҳҳо мавридҳои мушобеҳ минтақаҳои Ҷаҳон, ки шаҳрвандони тоҷик бо чунин мушкил гирифтор шудаанд мегӯянд, ин вазъият нишон дод, ки дар мудирияти кишвар ишколи бузурге вуҷуд дорад ва нотавонии раҳбарияти Тоҷикистонро дар муқобила бо Ковид-19 бештар мухолифони тоҷик барои мардум ва ҷомеаи кишвар намоён кард.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.