22-уми сентябри соли ҷорӣ, дар шаҳри Парижи Фаронса маросими супурдани “Тӯби тиллоӣ 2025” ба беҳтарин футболбози сол баргузор гардид.
Барандаи ин ҷоизаи бонуфуз, бори аввал ҳамлагари 28-солаи Фаронса аз бошгоҳи “Пари Сен-Жермен” Усмон Дембеле шуд.
Гуфта мешавад, ин ҷоиза ба Дембеле бештар барои он ки бо дастаи “Пари Сен-Жермен” Лигаи Қаҳрамонҳоро ба даст овард ва беҳтарин бозигари ин мусобиқот шинохта шуд, дода шудааст.
Зимни суханронияш дар ин маросим ӯ аз сармурабии дастааш Луис Энрике, ки ӯ ҷоизаи муррабии солро ба даст овард, изҳори сипос намуда, аз ҳамдастаи собиқи худ Лионел Месси ёд кард ва гуфт, ки аз ӯ бисёр чизҳоро дар Барселона омӯхтааст.
Дар ҳамин ҳол узви дастаи мунтахаби Испания ва бошгоҳи “Барселона” Ламин Ямали 18-сола ҷойи дувум, Витор Феррейра (Португалия, ПСЖ) ҷойи севум, Муҳаммад Салоҳ (Миср, “Ливерпул”) ҷойи чорум ва Рафиня (Бразилия, “Барселона”) ҷойи панҷуми бозигари беҳтарини ҷаҳониро ба даст оварданд.
Дар ин маросим беҳтарин бозигари ҷавон ва соҳиби ҷоизаи “Копа Трофи” соли дуввум пайи ҳам Ламин Ямал дониста шуд. Аз ҳамлагарон бошад, ҳамлагари “Арсенал” Виктор Гёкерес беҳтарин ҳамлагари сол дониста шуд ва соҳиби ҷойизаи “Мюллер Трофи” гашт.
Дар байни занон бозингари беҳтарини сол ва барандаи “Тӯби тиллоӣ” пайдарпай соли севум Айтана Бонмати испанӣ, ки дар тими “Барселона” бозӣ мекунад, дониста шуд. Ҷоизаи “Лев Яшин” ки барои беҳтарин дарвозабони сол дода мешавад, насиби Ҷанлуиҷи Доннарумма, дарвозабони Италия ва “Манчестер Сити”, ки пештар бо “Пари Сен-Жермен” Лига Қаҳрамонҳоро ба даст оварда буд, гардид.
Инчунин беҳтарин бошгоҳи мардона “Пари Сен-Жермен” ва беҳтарин бошгоҳи занона “Арсенал” дониста шуданд. Ҳарду бошгоҳ Лигаи Қаҳрамонҳои 2024/2025-ро ба даст овардаанд.
Ҷоизаи “Тӯби тиллоӣ” соли 1956 таъсис ёфта, онро ҳамасола маҷаллаи фаронсавии “France Football” месупорад. Соли 2020 бинобар пандемияи Коронавирус ин маросим лағв шуда буд.
“Тӯби тиллоӣ” аз соли 2010 якҷоя бо Федератсияи байналмилалии футбол (FIFA) супурда мешуд, аз соли 2016 “France Football” ҷоизаро алоҳида месупорад, ҳамзамон FIFA ҷоизаи худро барои бозигари беҳтарини сол таъсис додааст.
Аз ҳама бештар Лионел Месси ҳамлагари аргентинӣ, 8 маротиба ва ҳамлагари португалӣ Криштиану Роналду 5 маротиба соҳиби “Тӯби тиллоӣ” гаштаанд.
