Вакилони порлумони Қирғизистон (Жогорку Кенеш) маоши якрӯзаи худро “ҳамчун ёрии моддӣ ба мардуми Фаластин, ки дар рафти тезу тунд шудани ҷанги Фаластину Исроил зарар дидаанд”, мефиристанд.
Гуфта мешавад, ин қарори “Жогорку Кенеш” рӯзи 19-уми октябр қабул шуда, ба тарафдории он аз 76 вакиле, ки ширкат доштаанд, 47 нафарашон овоз доданд.
Инчунин дар ин ҷаласа бархе аз вакилон пешниҳод карданд, ки ба Навори Ғазза кумаки башардӯстона фиристанд ва Вазорати корҳои хориҷаи ин кишвар барои ҷамъоварии кумакпулӣ аз мардум суратҳисоб кушояд.
“Ман ба Вазорати корҳои хориҷӣ пешниҳод мекунам, ки суратҳисоб кушода шавад. Бархе аз номи мардуми Қирғизистон ба фаластинии осебдида кумаки молӣ расондан мехоҳанд, аммо намедонанд ин корро чӣ гуна анҷом диҳанд. Хуб мешавад, ки тавассути Вазорати корҳои хориҷӣ интиқол диҳанд“, – гуфтааст Ҷалолиддин Нурбоев.
Ин гуфтаҳои Нурбоевро дигар вакилон низ дастгирӣ карда, ба вазъи бади сокинони Ғазза ишора кардаанд ва хостаанд то ҳукумати Қирғизистон дар қазияи мазкур мавқеи худро низ равшан кунад.
Ёдовар мешавем, ки рӯзи 21-уми октябр дар шаҳри Бишкеки Қирғизистон беш аз сад нафар ба ҳимоят аз сокинони Ғазза тазоҳурот баргузор карданд.
