Имрӯз 12 феврал Вазорати тандурустии Тоҷикистон нишасти хабарӣ дошт. Вазири ин ниҳод, Ҷамолиддин Абдуллозода зимни нишасти хабарӣ ба чанд нуктаи муҳиме ишора кард, ки бештар ба бемории ҳамагири COVID-19 ва ваксиназанӣ марбут буд.
Вазир дар бораи интишори ин беморӣ тарсу ҳароси мардумро сабаби асосӣ номид ва гуфт, ки яке аз омилҳои кам паҳн шудани вирус дар Тоҷикистон ин сафарҳои Президент ба шаҳру навоҳии кишвар буд, ки мардумро даъват мекард то дар бораи ин беморӣ тарсу ҳаросро дар худ роҳ надиҳанд.
Ин дар ҳолест, ки сафарҳои Эмомалӣ Раҳмон ба шаҳру ноҳияҳои Тоҷикистон дар авҷи бемории ҳамагир аз ҷониби коршиносон мавриди интиқод қарор гирифта, дар бемасъулиятӣ ва хунукназарӣ нисбати ин беморӣ ва аҳолии кишвар айбдораш мекарданд.
Абдуллозода ҳамчунин ба омори гирифторони COVID-19 ишора кард. Ба гуфтаи ӯ, то ҳоло дар Тоҷикистон 13 308 нафар ба қайд гирифта шуд, ки аз ин шумора 90 нафар даргузашт ва 13 218 нафр ё худ 99,3 шифо ёфта ба хонаҳои худ баргаштанд.
Аммо омори расмии ҳукуматро ҷомеа ва коршиносони дохилӣ ва хориҷӣ бо шубҳа менигаранд. Фаъолони ҷомеаи шаҳрвандӣ дар ибтидои паҳншавии ин беморӣ дар Тоҷикистон вебгоҳеро барои рӯйхати фавтидагон аз ин беморӣ роҳандозӣ карда буданд, ки то қатъи фаъолияти ин вебгоҳ наздики 500 нафар фавтигаон аз ин беморӣ сабт шуда буд.
Инчунин вазир дар ин нишаст гуфт, ки табобати бемории коронавирус сад дар сад ройгон аз ҷониби давлат тақдим шуда буд. Аммо борҳо дар шабакаҳои иҷтимоӣ хабарҳо нашр мешуд, ки муолиҷаи ин беморӣ ройгон нест. Ҳатто аксари худи беморон, ки аз ин беморӣ шифо ёфта буданд, менавиштанд, ки муолиҷа ройгон нест ва ҳар бемор вобаста ба дараҷаи беморияш маблағ сарф мекунад. Корбарон аз ҳама камтарин маблағро 1200 сомонӣ ва бештар аз он мегуфтанд.
Аммо дар мавриди ин ки кай ваксиназанӣ дар Тоҷикистон оғоз мешавад, вазир таърихи мушаххасеро зикр накард, танҳо гуфт, ки тибқи барномаи “COVAX” давоми соли ҷорӣ 732 воя бояд ба кишвар ворид гардад.
Инчунин дар мавриди омори бемориҳои саратонӣ аз вазир суол шуд, ки ӯ дар посух гуфт, ҳоло дар кишвар 17245 гирифторони бемориҳои саратонӣ ба қайд гирифта шудаанд. Сабабҳои ингуна бемориҳоро ба дарозумрии аҳолӣ рабт дод. Ва омили дигари гирифтор шудан ба саратонро сари вақт муолиҷа накардан гуфт.
Вазир ҳарчанд талош мекард ба суолҳо кӯтоҳ посух гӯяд, вале суолҳо хеле зиёд буд. Ӯ ба чанд суоли муҳим посух нагуфт. Аз ҷумла дар мавриди санадҳои ташхиси духтари ноболиғи 12-солае, ки аз ҷониби наздиконаш таҷовуз шуда буд ва додгоҳи Ҳисор муттаҳамро аз толори додгоҳ раҳо кард, посух надод.
