Вазири корҳои хориҷии Туркия Мавлуд Човушоғлу рӯзи 28 март вориди Душанбе шуд. Ин мақоми баландпояи Туркия дар сафҳаи твиттерии худ ҳадафи сафараш ба Тоҷикистонро барои ширкат дар нӯҳумин конфронси “Қалби Осиё – Раванди Истанбул” арзёбӣ кард.
Қарор аст, вазири корҳои хориҷаи Туркия бо ҳамтои тоҷики худ ва инчунин бо раисҷумҳур Эмлмалӣ Раҳмон дар ин сафар дидору мулоқот кунад. Ӯ дар ин бора дар саҳифаи твиттериаш навишт, “Рӯзҳои 28-30 март мо бо вазири корҳои хориҷии Тоҷикистон Сироҷиддин Муҳриддин мулоқот карда, муносибатҳои дуҷонибаро дар соҳаҳои гуногун, масъалаҳои минтақавӣ ва ҷаҳон баррасӣ хоҳем кард. Инчунин мо бояд бо президент Эмомалӣ Раҳмон мулоқот кунем.”
Дар ҳамин ҳол рӯзи шоми якшанбе сухангӯи Вазорати умури хориҷаи Ҷумҳурии исломии Эрон Саид Хатибзода эълом дошт, ки Ҷавод Зарифӣ вазири хориҷаи ин кишвар низ озими Тоҷикистон мешавад.
“Доктор Зариф барои мулоқот бо мақомоти Тоҷикистон ва иштирок дар нишасти вазирони корҳои хориҷии кишварҳои узви ҳамоиши “Қалби Осиё – Раванди Истанбул” дар бораи Афғонистон, ки 29-30 март доир мешавад, озими Душанбе хоҳад шуд.”
Давраи нуҳуми нишасти вазирони хориҷии ҳамоиши “Қалби Осиё — Раванди Истанбул”, ки ба мавзӯъи субот ва пешрафти Афғонистон бахшида шудааст, қарор аст рӯзи 30-юми март дар Душанбе оғоз бишавад. Дар ин ҳамоиш вазирони корҳои хориҷии 15 кишвар ва президентҳои Тоҷикистону Афғонистон иштирок мекунанд.
Ҳамоиши аз соли 2011 инҷониб ҳама сола дар ҳар кишваре баргузор мешавад. Илова бар ҳузури вазирони хориҷии 15 кишвар боз намояндагони кишварҳо ва созмонҳои минтақавӣ ва байналмилалӣ иштирок мекунанд ва масъалаҳои сулҳу амният ва рушди иқтисодии Афғонистонро баррасӣ мекунанд.
