16.9 C
Dushanbe

Вокуниши Қирғизистон ба изҳороти КДАМ-и Тоҷикистон

Нирӯҳои марзбонии Қирғизистон изҳороти Раёсати Кумитаи давлатии амнияти миллии Тоҷикистон дар вилояти Суғдро рад кардааст.

Шоми 19-уми октябри соли 2022, Нирӯҳои марзбонии Қирғизистон бо нашри як изҳорот иддаоҳои ҷониби Тоҷикистонро, ки ҳамроҳи аксу наворҳо ҳамчун далел нашр шуда буд, рад кардааст.

Ҷониби Қирғизистон Тоҷикистонро пурра рад карда, Раёсати Кумитаи давлатии амнияти миллӣ дар вилояти Суғдро ба “дониста таҳриф кардани маълумот” ва “таҳрик додани сокинони манотиқи наздимарзӣ” муттаҳам карда гуфтааст, ки “иттилооти дар изҳороти ҷониби Тоҷикистон овардашуда комилан воқеият надорад.”

Субҳи 19-уми октябри соли ҷорӣ Раёсати Кумитаи давлатии амнияти миллии Тоҷикистон дар вилояти Суғд бо пешниҳоди беш аз 20 факту рақамҳо кишвари ҳамсояро ба омода шудан ба “низоъҳои нав” муттаҳам карда гуфта буд, “ҷониби Қирғизистон ба амалҳои иғвоангезона даст зада, ҳадафаш шиддатнок намудани вазъият дар ноҳияҳои наздисарҳадӣ мебошад.”

Аммо шоми ҳамин рӯз Нирӯҳои марзбонии Қирғизистон дар изҳораташ ҷониби Тоҷикистонро ба нусхабардорӣ аз ахбори онҳо ва табдили номи кишварҳо муттаҳам карда гуфт, ки “ҳайратовар аст, ки ҷониби Тоҷикистон кӯшиш мекунад, ки тақрибан тамоми иқдомоти худ барои таҳкими марз дар манотиқи марзии Тоҷикистонро ба марзбонони Қирғизистон “нисбат” диҳад.

Гуфта мешавад, низоъҳои марзӣ ва муноқишаҳои мусаллаҳона дар манотиқи наздмарзии Тоҷикистон ва Қирғизистон дар 10 соли ахир ба яке аз мушкилоти асосӣ барои ҳар ду ҷониб табдил ёфтааст.

Ба гуфтаи мақомоти ҳар ду кишвар, танҳо дар ҳодисаҳои 14-17-уми сентябри соли ҷорӣ аз ҳарду ҷониб беш аз 170 нафар кушта ва ҳудуди 400 нафари дигар захмӣ шуда буд. Аммо дар бораи ҳаҷми зарарҳое, ки барои сокинони ҳар ду ҷониб расида, маълумоти мувассақе то ҳол нашр нашудааст.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Идомаи “рейд”-и муҳоҷирон дар Русия

Ҳафтаи дуюм аст, ки дар шаҳру ноҳияҳои Федератсияи Русия...

Боздошти собиқ раиси Тоҷик-Эйр

Мақомоти Тоҷикистон собиқ раиси Фурӯдгоҳи байналмилалии шаҳри Душанбе ва ширкати ҳавопаймойи "Тоҷик-Эйр"-ро боздошт кардаанд.

Сиёсати ҷанг ё идораи об?

Дар натиҷаи набардҳои ба вуҷуд омада дар минтақаҳои ҳаммарзи Афғонистон ва Эрон дасти кам се нафар кушта ва даҳҳо каси дигар аз ду тараф ҷароҳат бардоштанд.

Аз истирдоди як тоҷик ба Душанбе пешгирӣ шуд

28-уми майи соли ҷорӣ аз истирдоди паноҳҷӯи тоҷик Сорбон Абдураҳимзодаи 30-сола аз Варшава ба Душанбе пешгирӣ шуд.