Нахустини сафари Президенти Украина ба Амрико ва мулоқотҳои ӯ бо Ҷо Байдан ва намояндаҳои ИМА дар Конгресс ва дигар мақомоти он кишвар ба вокунишҳои зиёде рӯбарӯ шудааст.
21-уми декабри соли 2022, Владимир Зеленский, раисҷумҳури Украина ба Иёлоти Муттаҳидаи Амрико сафар кард ва дар аошингтон бо Президенти ИМА Ҷо Байдан ва бо намояндаҳои Конгресси он кишвар мулоқот кард.
Ин сафари Президенти Уркиана ба Амрико ба замоне рост омад, ки ИМА бастаи нави кумакҳои худро дар ҳаҷми ҳудуди 2 миллиард доллар барои мубориза бо буҳронҳои амниятӣ, иқтисодӣ ва иҷтимоӣ дар Украина эълон кард.
Ҷо Байден ҳам дар суҳбат бо Владимир Зеленский гуфт, ки дар ин шароит дар паҳлуи Украина истодан барои Амрико шараф аст ва эълон кард, ки системаи дифоии патриоти амрикоӣ дар ҳаҷми 1,85 миллиард доллар барои дифои низомӣ ва ҳимоятҳои сиёсӣ ироа мекунад.
Владимир Зеленский ҳам дар Конгресси Амрико дар рӯбарӯи намояндаҳои он кишвар истода, “ИМА-ро дӯсти бузурги Уркиана ва мардуми он” хонд ва таъкид кард, ин паёмҳои ӯ хос барои вакилон не, балки барои тамоми амрикоиҳо мебошад.
Сенаторони амрикоӣ ҳам дар арафаи ташрифи Зеленский ба минбар барои суханронӣ кардан, қариб ҳама сари по рост истода, қисме аз онҳо низ барои дастфишорӣ бо ӯ дар ду самти долон сафороӣ карданд ва то оғози суханронӣ ҳам беш аз 175 сония барояш кафкӯбӣ карданд.
Ҷолиб он ки дар рафти ин суханронӣ пайваста Владимир Зеленский аз дарду машаққатҳо, сахтиҳои рӯзгор, паҳну парешон шудани мардуми кишвараш ва ҳамлаҳои хунини Русияи алайҳи шаҳру рустоҳои кишвараш мегуфт ва аз амрикоиҳо ва дигар кишварҳо барои кумакҳояшон ташаккур ва ситоиш мекард, вале сенаторон ҳар дақиқа барояш кафкӯбӣ мекарданд.
Гуфта мешавад, аз замони оғози ҳамлаҳои Русия аз 24-уми феврали соли 2022 то кунун Иёлоти Муттаҳидаи Амрико ҳудуди 100 миллиард доллар ба Украина кумак кардааст. Кишварҳои дигаре ба мисли кишварҳои узви Иттиҳоди Аврупо ва ғайра миллиардҳо доллар барои тақвияти низоми дифоӣ ва ҳимоятҳои сиёсӣ ва иқтисодӣ ба ин кишвар кумак кардаанд.
Аммо ҷанг ҳамоно дар ин кишвар идома дорад ва бар асари ҳамлаҳои сангини Русия ба зерсохторҳои ин кишвар дар пойтахт ва дигар бузургшаҳрҳои он низоми тавлид ва тақсимоти нерӯи барқ ва гармидиҳӣ фалаҷ шуда, ба гуфтаи Президенти Украина, айни замон миллионҳо нафар дар сардиву торикӣ дар ин кишвар ранҷ мебаранд.
Амруллоҳи Низом, махсус барои Azda tv
