Рӯзи якшанбе, 25-уми феврали соли ҷорӣ як сарбози нерӯҳои ҳавоии Амрико дар назди сафорати Исроил дар Вашингтон худро оташ зад.
Ба гузориши хабаргузории CNN, пулиси Вашингтон дар шарҳи ҳодиса гуфта, ки он 25-уми феврал тақрибан соати 13:00 ба вақти маҳаллӣ рух дод ва Хадамоти махфии ИМА ва полис дар ҳол ба ҷои ҳодиса худро расонда, сарбозро ба бемористон интиқол додаанд, вале табибон вазъи саломатии ӯро вазнин арзёбӣ мекунанд.
Сухангӯи нерӯҳои ҳавоии Иёлоти МУттаҳидаи Амрико Роуз Райлӣ низ ин ҳодисаро таъйид карда, гуфтааст, ки номи он сарбоз Аарон Бушнелл буд ва дар нерӯҳои ҳавоии кишвараш адои хидмат мекард.
Сабаби ба чунин кор даст задани сарбози амрикоӣ, мухолифат бо сиёсатҳои кишвараш дар бораи кумак ба Исроил ва бомборон шудани мардуми Ғазза, аз ҷумла кушта шудани кӯдакони фаластинӣ тавассути артиши Исроил гуфта мешавад.
Наворе, ки дар шабакаҳои иҷтимоӣ роҳ ёфт, дида мешавад, ки сарбоз ҳодисаро пурра бо телефони ҳамроҳаш ба навор гирифтааст. Ӯ пеш аз худро отша задан аввал телефонашро дар замин насб мекунад ва сипс дар сари худ маводи сӯзишворӣ мепошад ва бо гуфтани “Озодӣ ба марудми Фаластин”, худро оташ мезанад.
Ба гузориши CNN, ин сарбози ҷавон дар навор гуфтааст, ки номаш Аарон Бушнелл аст ва намехоҳад “дигар шарики наслкушӣ шавад”. Ӯ гуфтааст, ки “худро оташ задан дар баробари азоби фаластиниҳо хеч аст.”
Пулиси Вашингтон таҳқиқро дар бораи ин ҳода оғоз кардааст. Ваҳоло ангезаи аслии ин ҳодисаро расман шарҳ надодаанд.
Ёдовар мешавем, ки Исроил шуруъ аз 7-уми октябри соли 2023, пас аз ҳамлаи ҲАМОС ба девори Ғазза, ки дар ихтиёри Исроил аст, ба Навори Ғазза ҳуҷум кард ва то ҳол идома дорад. То кунун, бино ба гуфтаи Вазорати тандурустии Фаластин, 30 ҳазор фаластинӣ кушта шудааст, ки беш аз 70 дарсади онҳоро кӯдакону занон ва пиронсолон ташкил медиҳанд.
