Ҷузиёти бештар аз даргириҳо дар Хоҷа Аъло
Як манбаъ аз маҳалли даргириҳо дар Хоҷа Аъло ба “Аздо тв” гуфт, ки дар пайи даргириҳои имрӯза байни нерӯҳои марзбонии тоҷику қирғиз дар минтақаи Хоҷа Аълои шаҳри Исфара беш аз 40 нафар захмӣ шудаанд ва онҳоро дар масҷиди Хоҷа Аъло нигоҳ медоранд.
Теъдоди кушташудаҳо то ҳанӯз маълум нест, вале тибқи баъзе манобеъ 4 нафар аз сокинони Хоҷа Аъло низ дар ин даргириҳо кушта шудаанд.
Дар байни захмиён 9 шаҳрванди маҷруҳи Қирғизистон низ вуҷуд доранд, ки ба қавли манбаъ, яке аз онҳо подполковник мебоашд.
Ӯ мегуяд, дар Хоҷа Аъло танҳо нерӯҳои марзбонӣ, пулис ва мардуми маҳаллӣ муқовимат доранд ва аз нерӯҳои вижа “Алфа” ё Горди раёсатҷумҳурӣ хабаре нест.
Ҳамчунин дар наворҳое, ки ба дасти “Аздо тв” расид, дида мешавад, ки мардумоне, ки бо забони қирғизӣ суҳбат доранд, дар дастонашон маводи оташзо хонаҳои мардуми маҳалро оташ мезананд.
Як манбаи дигар ба “Аздо тв” гуфт, ки Баҳоваддин Баҳодурзода, шаҳрдори Исфара, ки дар минтақаи даргирӣ ҳузур дошта низ захмӣ шуда, ҳамроҳи дигар захмиён дар масҷиди Хоҷа Аъло мебошад ва ӯ аз қисмати пушташ захм бардоштааст.
Ба гуфтаи манбаъ, аз баски роҳ байни Хоҷа Аъло бо Исфара бастааст ӯ ҳамроҳи дигар захмиён онҷо банд мондаанд. Ба “Аздо тв” муяссар нашуд ин маълумотҳоро аз манобеи дигар тайид кунад, дар сурати дастрасӣ ба маълумоти бештар хабар такмил хоҳад шуд.
