31.9 C
Dushanbe

Заҳролӯдшавии зиёда аз 40 нафар дар зиндони Ваҳдат

Дар зиндони нави шаҳри Ваҳдат ҳудуди 40 тан аз маҳбусон заҳролӯд шуда, бо марг дасту панҷа нарм мекунанд.

Муассисаи ислоҳии ҷазои ҷиноятии ЯС 3/1-и Вазорати адлия дар шаҳри Ваҳдат

Манобеи Аздо тв аз Муассисаи ислоҳии ЯС 3/1-и Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон (СРИҶҶ ВА ҶТ), ки дар шафати роҳи Душанбе-Ваҳдат нав бунёд шудааст, мегӯянд, дар як ҳафтаи ахир ҳудуди 40 нафар аз зиндониён заҳролӯд шуда, беморон айни замон дар шуъбаи беҳдоштии зиндон (санчаст), дар долонҳои он ва қисме ҳам дар катҳои хоби худ бистарӣ шудаанд.

Ба гуфтаи манобеи Аздо тв, сарчашмаи ин заҳролӯдшавии гусутурдаи зиндониён хазонаи зеризаминии оби муассиса будааст, ки дар натиҷаи дуруст ҳифозат накардани он оби ошомидании зиндон заҳролӯд гаштааст.

Интиқоли зиндониён ба ин муассисаи ислоҳӣ, ки нав бунёд шудааст, се моҳ пеш оғоз шуда буд. Аммо Аздо тв ҳанӯз ду моҳ қабл дар як гузориши муфассали худ иттилоъ дода буд, оби ошомидание, ки дар ин маҳбасхона барои зиндониён ихтисос додаанд, бо сабабҳои риоят нашудани қоидаҳои беҳдоштӣ нӯшидани он ба саломатии маҳкумшудагон зарар дорад.

Аммо пас аз расонаӣ шудани аҳволи бади зиндониён дар ин муассисаи ислоҳӣ, рӯзи 13-уми октябри соли ҷорӣ Ваколатдори ҳуқуқи инсон дар Тоҷикистон Умед Бобозода аз ин зиндон дидан намуд ва иддаъо кард:

“Умуман дар рафти суҳбат маҳкумшудагон аз шароити нигоҳдорӣ, либос, хӯрок ва муносибати кормандони муассиса изҳори миннатдорӣ намуданд.”

Бар асоси маълумоти ба даст расида беморони заҳролӯдшуда, аввал ин, ки иштиҳо надоранд, вале вақте ҳам ягон хӯрок бихӯранд, дарҳол дилбеҳузӯрӣ пайдо карда, хӯрокҳои тановулкардаашонро қай мекунанд. Акнун шуъбаи беҳдоштӣ ва атрофи онро бӯйи нофорами таъомҳои қайшуда фаро гирифта, тамизкорони зиндон низ тавре мебояд сари вақт утоқҳо ва раҳрави шуъбаро тамиз намекунанд.

Гуфтанист, ба Аздо тв муяассар нашуд, ки ҳувияти афроди заҳролӯдшударо якояк муаяйн кунад ва мушаххас намояд, ки оё дар байни касоне, ки тайи як ҳафтаи ахир аз нӯшидани оби ошомиданӣ дар ин муассиса заҳролӯд шудаанд, афроди фавтида ва ё касе аз зиндониёни сиёсӣ низ вуҷуд дорад ё на?

Аммо иттилоъ дақиқ аст, ки аксари кулли беморони заҳролӯдшуда зиндониёне мебошанд, ки аз оилаҳои камбизоат ва ё аз шаҳру ноҳияҳои дурдасти Тоҷикистон ҳастанд ва тавони пулие надоранд, ки мисли дигарон барои нӯшидан оби тоза бихаранд. Агар як зарфи 5 литраи оби тоза дар берун аз зиндон 7 сомонӣ қиммат дошта бошад, дар дохили муассиса онро бо нархи 10 то 12 сомонӣ мефурӯшанд, ки ҳама тавони хариди онро надорад.  

Мақомоти расмӣ ва бахусус Сарраёсати иҷорои ҷазои ҷиноятии Вазорати адлияи Тоҷикистон то ҳол дар бораи ин заҳролӯдшавии маҳсубон ягон хабару гузориш надодаанд, аммо таҷриба нишон дода, ки мақомот дар ҳодисаҳои ба ин монанд аксар маврид аз расонаӣ кардани ахбор худдорӣ мекунанд.

Бинои нави Муассисаи ислоҳии ҷазои ҷиноятии ЯС 3/1-и Вазорати Адлияи Тоҷикистон дар шафати роҳи Душанбе-Ваҳдат бунёд шуда, се моҳ пеш ба кори худ оғоз кардааст. Пеш аз ин муассиса дар 300-метрии хонаи президент Эмомалӣ Раҳмон дар маркази пойтахт ҷойгир буд. Бинои кӯҳнаро харобу валангор карда, айни замон Таҳминаи Эмомалӣ, духтари раисҷумҳур барои худаш дар ҷои он маркази тиҷоратӣ месозад.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Анҷумани иқтисоди рақамии СҲШ дар шаҳри Тянҷзини Чин

Дар чаҳорчӯби Анҷумани иқтисоди рақамии Созмони ҳамкории Шанхай (СҲШ) дар шаҳри Тянҷзини Чин ҷаласаи пӯшидаи вазирони иқтисодии кишварҳои узви ин созмон баргузор гардид.

Боздошти як омӯзгори забони англисӣ дар Душанбе бо иттиҳоми рафтори ғайриахлоқӣ

Раёсати корҳои дохилии шаҳри Душанбе хабар дод, ки як марди 50-сола бо иттиҳоми рафтори ғайриахлоқи ба як гурӯҳ духтарони ҷавон боздошт шудааст.

Чаро мақомот дар бораи хабари ихроҷи муҳоҷирони афғонистонӣ хомӯшанд?

Масъулини муҳоҷирони афғонистонӣ дар Душанбе хабари ихроҷи шаҳрвандони Афғонистон аз Тоҷикистонро рад карданд.

Боздошти ду тоҷикистонӣ бо гумони ба асорат гирифтани ҳамватани худ

Мақомоти Русия хабар доданд, ки ду шаҳрванди Ҷумҳурии Тоҷикистон бо гумони ба асорат гирифтан ва латтукӯби як ҳамватани худ боздошт шудаанд.