Владимир Зеленский мегӯяд, ки мақомоти баландпояи кишвараш ба вай итминон додаанд, ки дар таркиши мушкаҳо дар хоки Лаҳистон Украина муқассир нест.
Бино ба иттилои ББС, Президенти Украина гуфтааст, фармондеҳони аршади артиши Украина ӯро итминон доданд, ки омили ин таркиши "мушаки мо набудааст".
Владимир Зеленский ҳамчунин аз мақомоти Лаҳистон хостааст, ки ба коршиносони украинӣ иҷоза диҳанд, то ба маҳалли таркиш ворид шаванд ва дар тафтишот ширкат кунанд.
Ин изҳороти ҷаноби Зеленский дар ҳоле садо дода, ки дабири кулли НАТО Йенс Столтенберг гуфта буд, ки дар таркиши мушакҳо дар хоки Лаҳистон “ба эҳтимоли зиёд” мушакҳои Шабакаи дифои ҳавоии Украина муқассир будаанд.
Ҳамзамон дирӯз, Президенти Лаҳистон Анджей Дуда ва Нахуствазири ин кишвар Матеуш Мароветский баъд аз нишасти Шӯрои амнияти миллӣ дар як нишасти матбуотӣ якҷо ширкат карда гуфтанд, ки ҳеч нишона ва аломатҳоеро пайдо накардаанд, ки дар ҳодисаи рӯзи сешанба "қасдан ба хоки Лаҳистон ҳамла сурат гирифта бошад."
Гуфта мешавад, асри рӯзи 15-уми ноябр ду мушак ба қаламрави Лаҳистон исобат карда, ду нафар кушта шуда буд ва гуфта мешуд, ки Русия онҳоро партоб кардааст. Аммо худи Кремлин низ ин иддаоро рад кард.
