Мақомоти Тоҷикистон эътироф карданд, ки ҳаҷми истеҳсоли нерӯи барқ нисбат ба ҳамин давраи соли гузашта коҳиш ёфтааст. Ҳамзамон ширкати «Барқи Тоҷик» итминон медиҳад, ки дар зимистони имсол маҳдудияти интиқоли барқ ҷорӣ нахоҳад шуд. Ин ду хабар, ки тақрибан ҳамзамон нашр шуданд, дар ҷомеа суолҳои зиёдеро ба вуҷуд овардаанд.
Дар назари аввал, байни онҳо зиддият эҳсос мешавад. Агар истеҳсол коҳиш ёфта бошад, пас чӣ гуна истеъмоли зимистона бе маҳдудият таъмин хоҳад шуд? Албатта, мумкин аст масъулон барои чунин изҳорот ҳисобу китоб ва далелҳои техникии худро дошта бошанд. Шояд захираи об дар обанборҳо, ворид шудани иқтидорҳои нав ё дигар омилҳо онҳоро ба чунин хулоса расонда бошад. Аммо то замоне ки ин далелҳо ба таври муфассал ба ҷомеа пешниҳод нашаванд, саволҳо боқӣ мемонанд.
Тоҷикистон худро кишвари дорои захираҳои бузурги гидроэнергетикӣ меномад. Солҳост, ки ба мардум гуфта мешавад: баъди ба истифода додани агрегатҳои нави Неругоҳи барқи обии «Роғун» мушкили норасоии барқ тадриҷан аз байн меравад. Бо вуҷуди ин, аксари сокинони кишвар ҳанӯз зимистонҳои зиёдеро дар хотир доранд, ки дар деҳоту ноҳияҳо барқ бо ҷадвали маҳдуд дода мешуд. Аз ҳамин сабаб, ҳар боре ки мақомот аз «набудани лимит» ҳарф мезананд, бисёриҳо мунтазир мешаванд, ки воқеиятро дар рӯзҳои сарди зимистон бубинанд.
Масъала танҳо дар ҳаҷми истеҳсоли нерӯи барқ нест. Солҳо боз коршиносон аз талафоти зиёди нерӯ дар шабакаҳои кӯҳна, самаранокии пасти тақсимоти барқ ва зарурати навсозии инфрасохтор сухан мегӯянд. Агар ин мушкилот пурра ҳал нашуда бошанд, афзоиши истеҳсол ҳам на ҳамеша ба беҳтар шудани таъминоти аҳолӣ оварда мерасонад.
Имрӯз ҷомеа бештар аз ҳарвақта ба шаффофият ниёз дорад. Агар истеҳсол воқеан коҳиш ёфта бошад, мардум ҳақ доранд донанд, ки сабаб чист ва чӣ тадбирҳо андешида шудаанд, то ин коҳиш ба зиндагии онҳо таъсир нарасонад. Вақте чунин маълумот ошкоро пешниҳод мешавад, эътимод низ бештар мегардад.
Аз ин рӯ, муҳимтарин санҷиши изҳороти имрӯз на нишастҳои матбуотӣ, балки худи зимистон хоҳад буд. Агар хонаҳои мардум бидуни маҳдудият барқ гиранд, ваъдаи мақомот тасдиқи худро меёбад. Аммо агар боз лимити барқ баргардад, ҷомеа ҳатман хоҳад пурсид: чаро бо вуҷуди ваъдаҳои зиёд ва сармоягузориҳои бузург дар соҳаи энергетика, ин масъала ҳанӯз ҳам ҳалнашуда боқӣ мондааст?
