Дар Бишкек пас аз барканории Қамчибек Тошиев аз вазифаи муовини раиси Девони вазирон ва раиси Кумитаи давлатии амнияти миллии Қирғизистон раванди тағйироти кадрӣ дар сохторҳои қудратӣ ва дигар ниҳодҳои давлатӣ идома дорад.
Имрӯз, 17-уми феврал раисҷумҳури Қирғизистон Содир Ҷабборов фармон дар бораи таъйини Оқилбек Намазовро ба вазифаи муовини раиси КДАМ-и Қирғизистон имзо кард. Намазов дар ин вазифа Тимур Шабданбековро иваз кардааст.
Гуфта мешавад, Оқилбек Намазови 54-сола зодаи шаҳри Душанбе буда, то ин дам дар вазифаи муовини раиси Хадамоти давлатии гумруки Қирғизистон кор мекард.
Бояд гуфт, ин тағйирот дар КДАМ-и Қирғизистон дар ҳолест, ки чанде пеш Содир Ҷабборов ҳампаймони асосиаш Қамчибек Тошиевро, ки дар табобат дар Олмон қарор дошт, якбора аз вазифа барканор карда, ба дигаргунӣ дар КДАМ-и Қирғизистон даст зад ва Хадамоти марзбонӣ ва Хадамоти рақами 9, ки масъулияти таъмини амнияти президентро ба уҳда дорад, аз зери идораи он берун овард.
Пас аз барканории Тошиев сухангӯйи Ҷабборов аз номи ӯ навишта буд, “ин тасмимро, пеш аз ҳама, ба манфиати кишварамон қабул кардам, то дар байни ҷомеа ва ниҳодҳои давлатӣ тафриқа (ҷудоӣ) нашавад ва баръакс ягонагӣ тақвият ёбад”.
Ҳамчунин се муовини Тошиев аз вазифа барканор шуда, чанде аз кормандони ин ниҳод бо иттиҳоми фасодкорӣ ва дигар ҷиноятҳо боздошт гардидаанд.
Тошиев дар ҳоле аз вазифаҳояш барканор шуд, ки дар аввали моҳи феврал дар Қирғизистон дар мавриди муҳлати салоҳиятҳои президент баҳс бархост ва 75 сиёсатмадор дар як муроҷиатнома хостори гузарондани интихоботи нав шуданд.
Панҷ тан аз муаллифони нома, аз ҷумла сафири пешини Қирғизистон дар Узбекистон Эмилбек Узоқбоев; ходими иҷтимоӣ Бекболот Талгарбеков; вакили пешини маҷлис Қурмонбек Деҳқонбоев; муовини пешини вазири корҳои дохилӣ Курсан Асанов ва муовини собиқи сарвазир Аали Қарашев бо иттиҳоми талоши ташкили беназмиҳои оммавӣ дар Қирғизистон дастгир шудаанд.
Пас аз ин Нурлан Турғунбек, раиси порлумони Қирғизистон, рӯзи 12-уми феврал дар пасманзари “тағйироти ҷиддии сиёсӣ” дар кишвараш курсиро ихтиёрӣ тарк кард.
Ҳамчунин дар дигар ниҳодҳои давлатии Қирғизистон барканории мақомдорон идома дошта, рӯзи 16-уми феврали соли ҷорӣ вазири нақлиёт Абсаттор Сирғабоев, вазири захираҳои табиӣ Медер Машиев ва вазири ҳолатҳои фавқулода Бообек Аҷикеев бо фармони Ҷабборов аз мақомҳояшон озод гардиданд.
Расонаҳои қирғизӣ афроди барканоршударо наздикони Қамчибек Тошиев ном мебаранд. Вале то ҳанӯз Тошиев ё афроди наздик ба ӯ вокуниши расмие ба ин тағйироти Ҷабборов нашр накардаанд.
