Додгоҳи шаҳри Хуҷанд Аслиддин Шарипов, бародари мухолифи тоҷик, Шавкати Муҳммадро барои 12 сол аз озодӣ маҳрум кард.
Дар ин бора имрӯз, 29-уми июл Радиои Озодӣ аз манобеи худ хабар дод. Ин расона навишта, ки муҳокимаҳои додгоҳии Шарипов дар шаҳри Хуҷанди вилояти Суғд доир шуда, моҳи марти соли ҷорӣ ҳукми ӯ содир шуда буд. Вале то кунун ҳатто наздиконаш дар ин бора хабар надоштаанд.
Манобеи Радиои Озодӣ гуфтаанд, ки Додгоҳи шаҳри Хуҷанд Аслиддин Шариповро дар “Ҳамкорӣ бо ҳизбу ҳаракатҳои мамнуъ ва таблиғи онҳо дар интернет” айбдор карданд.
Ба қавли яке аз дӯстони Аслиддин, ки нахоста номаш фош шавад, ӯ ҳоло аз Боздоштгоҳи муваққатии шаҳри Хуҷанд ба яке аз зиндонҳои шаҳри Душанбе интиқол дода шудааст.
Ёдовар мешавем, ки моҳи сентябри соли 2022 Аслиддин Шарипови 37-сола бо дархости мақомоти Тоҷикистон дар Русия боздошт гардид ва моҳи октябри соли 2023 ба Тоҷикистон истирдод шуд. Гуфта мешавад, Аслиддин Шарипов аз соли 2021 аз ҷониби Тоҷикистон дар пайгард қарор доштааст.
Кумитаи ҳуқуқи башари Созмони Милали Муттаҳид моҳи сентябри 2023 ба мақомоти Русия тавсия карда буд, ки Аслиддин Шариповро ба Тоҷикистон истирдод накунад. Аммо Додситонии кулли Русия ин тавсияи Кумитаи ҳуқуқи башари СММ-ро ба инобат нагирфт ва бо судури қароре ӯро дар торихи 1-уми октябри соли 2023 ба мақомоти Тоҷикистон таслим кард.
Аслиддин Шарипов, бародари мухолифи фаъоли тоҷик Шавкати Муҳаммад, ровии чанде аз барномаҳои телевизионии Паймони миллии Тоҷикистон аст, ки барномаҳои ӯ бо гузоришҳои интиқодӣ дар бораи сиёсатҳои ҳукумати Тоҷикистон ва пӯшиши буҳрони ҳуқуқи башар дар ин кишвар дар шабакаҳои иҷтимоӣ маъруфанд.
Шавкати Муҳммад пештар гуфта буд, ки ҳадафи аслии боздошту ҳабси бародараш маҳз барои хомӯш кардани ӯ мебошад.
Ӯ 10-уми октябри соли 2023 бо нашри номаи саргушодае ба Додситони кулли Тоҷикистон Юсуф Раҳмон дар саҳифаи фейсбукияш навишт, ки Додситонии вилояти Суғди Тоҷикистон бародараш Шарипов Аслиддинро бо терроризм ва ифротгароӣ муттаҳам карда, алайҳи ӯ бо қисми 2 модаи 307.3 Кодекси ҷиноятии Ҷумҳурии Тоҷикистон парванда боз карда, аз моҳи декабри соли 2021 дар пайгард қарор дода буданд.
Шавкати Муҳаммад дар номаи худ айбҳои алайҳи бародараш эълоншударо рад карда, навишта буд, ки узвият дар “Гурҳи 24”, ҲНИТ ва нашри матолиби дорои хусусияти террористӣ дар саҳифаи шахсияш дар Фейсбук туҳмат аст.
Аммо мақомот то ҳол ба таври расмӣ сабаби боздошту зиндонӣ кардани Аслиддин Шариповро шарҳ намедиҳанд ва ҳамчунин ба номаву дархостҳои Шавкати Муҳаммад низ посух надоданд ва ҳамзамон ҳеч дархости созмонҳои ҳуқуқи башарро низ ба инобат нагирафтанд.
