Мақомоти Русия садҳо зиндонии шаҳрвандони Тоҷикистон ва Узбекистонро маҷбур мекунанд, то ба ҷанг алайҳи Украина бираванд.
Садҳо нафар аз муҳоҷирони Тоҷикистон ва Узбекистон, ки дар маҳбасҳои Русия ҳастанд, ба идораи «Настоящее время» хабар доданд, ки мақомоти Русия онҳоро маҷбур мекунанд, то ба ҷанг бар зидди Украина бираванд.
Ба қавли манбаъ, дар номае, ки ҳудуди 400 нафар аз муҳоҷирони зиндонӣ ба унвони ин расона фиристодаанд, гуфта мешвад, ки мақомоти Русия барои озодии онҳо се шарт гузоштаанд:
1. Талаби шаҳрвандии Русия карда, аз шаҳрвандии кишвари худашон (Тоҷикистон ва Узбекистон) даст бикашанд, то фиристодани онҳо ба ҷанг осонтар шавад.
2. Тибқи имзои қарордод ба ҷанги Русия алайҳи Украина бираванд.
3. Дар сурати қабул накардани ду шарти аввал бояд ба утоқҳои ҷаримавӣ (штрафной изолятор) фиристода шаванд.
Пеш аз ин дар соли 2023 низ хабар дода мешуд, ки мақомоти Русия борҳо “рейд”-ҳои оммавӣ ташкил карда, даҳҳо муҳоҷирро боздошт карда, барои имзои қарордодҳои маҷбурӣ ба комиссариатҳои ҳарбӣ бурдаанд.
Инчунин ба муҳоҷироне, ки шаҳрвандии Русия надоранд, пешниҳод мекарданд, ки барои ба даст овардани шарҳрвандии Русия нахуст бо мақомоти Русия қарордоҳои ҳарбӣ имзо карда, ба ҷанг раванд ва дар муддати кӯтоҳ шаҳрвандии Русияро ба даст оранд.
Моҳи июни соли 2024, Александр Бастрикин, раиси Кумитаи тафтишоти Русия хабар дода буд, ки дар Русия зиёда аз 30 ҳазор хориҷиреро ошкор карданд, ки ба наздикӣ шаҳрвандии Русияро гирифтаанд, вале барои сабти ному насаби худ ба коммисариатҳои ҳарбӣ муроҷиат накардаанд. Ва баъдан мақомот 10 ҳазори онҳоро барои кандани хандақҳо ба минтақаи «СВО» фиристод.
