Бино ба иттилои вазири рушди иқтисоди Русия Максим Решетников, бо сармоягузории кишвараш дар Тоҷикистон 300 корхона сохта ва ба истифода дода шудааст.
Ба иттилои сомонаи Вазорати рушди иқтисоди Русия, вазири ин ниҳод Максим Решетников зимни як сафари корӣ ба Душанбе бо Сарвазири Тоҷикистон Қоҳир Расулзода мулоқот кардааст.
Гуфта мешавад, ҷонибҳо масъалаҳои рушди ҳамкориҳои тиҷоратию иқтисодӣ ва сармоягузорӣ, ҳамкорӣ дар соҳаи маориф ва сиёсати муҳоҷиратро баррасӣ карданд.
Дар ин мулоқот Максим Решетников таъкид карда, ки Русия аз лиҳози сармоягузорӣ ба иқтисоди Тоҷикистон дар ҷои дуввум қарор дорад ва яке аз шарикони пешрафтаи тиҷоратии кишвар мебошад. Ба гуфтаи ӯ, ҳоло дар Тоҷикистон беш аз 300 корхона бо ширкати Русия фаъолият доранд. Ӯ ҳамчунин афзуда, ки “соҳибкорони рус ба соҳаҳои сохтмон, энергетика, коммуникатсия, иктишофи геологӣ, хадамоти молиявӣ, тандурустӣ, савдо ва сайёҳӣ фаъолона сармоягузорӣ мекунанд.”
Вале вазири рушди иқтисоди Русия дар мулоқот бо Сарвазири Тоҷикистон таъкид карда, ки барои рушди ҳамкориҳои тиҷоратӣ ва сармоягузорӣ, “ҳисоббаробаркуниҳои боэътимод ва бефосила зарур аст.”
Ин таъкиди мақомдори Русия дар мавриди “ҳисоббаробаркуниҳои бефосила” дар ҳолест, ки ширкати “Барқи тоҷик”, ниҳоди асосии барқтаъминкунанда дар Тоҷикистон аз нерӯгоҳҳои “Сангтӯда-1″ ва Сангтӯда-2”, ки русҳо онҳоро идора мекунанд, миллионҳо доллар қарздор аст ва солҳост, ки наметавонад қарзи худро бо ин нерӯгоҳҳои барқи обӣ соф кунад.
