Қарор аст нерӯҳои мусаллаҳи Ҷумҳурии Тоҷикистон ва Ҷумҳурии исломии Эрон дар якҷоягӣ размоиши муштаракаи низомӣ баргузор кунанд.
Бино ба иттилои хабаргузории “Тасним“-и Эрон, як ҳайати низомие зери раҳбарии генерал Шараф Эгамзод, ҷонишини Ситоди кулли нерӯҳои мусаллаҳи Тоҷикистон ба Эрон сафар карда, бо ҳамтои эронии худ “дар хусуси чигунагии баргузории размоишҳои мураккаб бо ҳамкории ду кишвар” гуфтугӯ кардааст.
Ба қавли манбаъ, дар рафти ин дидор Ҳусейн Валиванд Замонӣ, фармондеҳи Донишгоҳи фармондеҳӣ ва Ситоди артиши Эрон ҳам гуфта, ки “Донишгоҳи фармондеҳӣ ва Ситоди артиши Ҷумҳурии Исломии Эрон аз иртибот бо кишварҳои дӯст ва ҳампаймон, аз ҷумла Тоҷикистон дар тамоми ҳавзаҳо ва бавежа ҳавзаи дифоӣ ва низомӣ истиқбол мекунад ва умедвор ҳастем, ки таъомулоти байни ду кишвар беш аз пеш густариш ёбад.”
Гуфта мешавад, дар ҷараёни ин сафар ҷониби Тоҷикистон таъкид кардааст, ки омӯзишҳои низомӣ дар Тоҷикистон торихи тӯлонӣ дорад ва чун омӯзишҳои анҷомшуда дар Эрон шабоҳати бисёре бо омӯзишҳои низомӣ дар Тоҷикистон дорад, “умедворем битавонем дар арсаҳои дифоӣ ва тавсеаи ҳамкориҳо гомҳои хубе бардорем.”
Дар хусуси ин сафар ва вохӯрии расмии намояндагони низомии Тоҷикистон бо намояндагони Эрон то ҳол расонаҳои давлатии Тоҷикистон, бахусус маркази матбуоти Вазорати мудофеи кишвар иттилое нашр накардааст.
