Мақомоти ноҳияи Кӯшониён (собиқ Бохтар) хоҳарзодаи Шамсиддини Саид – узви аршади Ҳизби наҳзати исломии Тоҷикистонро боздошт ва бар зиддаш бо моддаи 307 парвандаи ҷиноӣ боз кардаанд.
Ин дар ҳолест, ки як моҳ пеш фарзандаш, Абдуллоҳи Шамсиддинро мақомоти тоҷик барои як “лайк” зери кадом посте дар Фейсбук барои 7 сол маҳкум ба зиндон карда буданд.
Рӯзи 22-уми апрел Шамсиддин Саид дар тамос бо Azda tv боздошти хоҳарзодааш Саидов Саидумари 31-соларо тасдиқ карда, гуфт, ки мақомоти шуъбаи Вазорати корҳои дохилии ноҳияи Кӯшонинён рӯзи 18-уми апрели соли ҷорӣ ӯро даъват карда, “пас аз чанд соати бозпурсӣ дар бораи ман” боздошт ва алайҳаш мувофиқи моддаи 307-и Кодекси ҷиноятии Тоҷикистон парванда боз карданд. “Кушишҳои модараш барои дидор бо фарзандаш натиҷа надодааст.”
Бино ба иттилои манбаъ, Саидов Саидумар, ки оиладор ва интизори таваллуди аввалин фарзандаш буд, ба он муттаҳам мешавад, ки гӯё бо худи Шамсидддини Саид дар иртибот будааст, аммо Шамсиддини Саид мегӯяд, наздиконаш “аз тарси фишори мақомот ҳеч иртиботе бо ман надоштанд.”
“Пас аз боздошти Саидумар кормандони шуъбаи Вазорати корҳои дохилии ноҳия, Ҳусензода Сафар ва Қурбонзода Бурихон бе ягон иҷозати расмӣ хонаи зисти хоҳарамро кофтӯкоб намуда, телефонҳо ва паспортҳои модару писарро бо худ бурдаанд.”, – мегӯяд Шамсиддини Саид.
Ин узви аршади ҲНИТ таъкид мекунад, ки боздошти хоҳарзодааш идомаи фишорҳои мақомот боло ӯст. “Пас аз ҳукми 7 соли зиндон ба Абдуллоҳи писарам боздошти хоҳарзодаамро идомаи фишорҳо болои хеш ҳисоб менамоям.”
Гуфта мешавад, муфаттиш Маҳмудзода Фарҳод парвандаи Саидов Саидумарро пеш мебарад.
Ёдовар мешавем, ки мақомоти тоҷик пас аз ихроҷи Абдуллоҳи Шамсиддини, писари Шамсиддини Саид аз Олмон ба Тоҷикистон 29-уми марти соли ҷорӣ ӯро бо моддаи 307 қисм 1-и Кодекси ҷиноятии Тоҷикистон гунаҳкор дониста, 7 сол аз озодӣ маҳрум сохт.
