Як ҳайат аз Додситонии кулли Тоҷикистон бо раҳбарии Юсуф Раҳмон, додситони кулли кишвар 2-уми майи соли ҷорӣ ба Туркия сафар карда, онҷо бо додситони кулли Туркия Бекир Шоҳин мулоқоту гуфтугӯ карданд.
Гуфта мешавад, Додситонҳои кулли ҳарду кишвар ҳамкориҳои муштарак “дар заминаи мубориза бо ҷинояткорӣ, бахусус терроризм, ифротгароӣ, қочоқи маводи мухаддир, ҷиноятҳои муташаккили фаромиллӣ ва масъалаи эътирофи созмону такшкилотҳои хатарзо ҳамчун террористӣ дар ҳудуди якдигарро баррасӣ карданд.”
Тавре дар хабари зикр мешавад, ҷонибҳо дар рафти гуфтушунидҳо ба мувофиқа расиданд, ки таҷрибаи муштараки мубориза бо ҷиноятҳои созмонёфтаи фаромиллӣ ва табодули иттилоотро идома диҳанд.
Дар рафти он ҳамкории мақомоти прокуратураҳои кишварҳо дар самти муборизаи муштарак бо ҷинояткорӣ, бахусус терроризму ифротгароӣ, қочоқи маводи мухаддир, ҷинояткории муташаккили фаромиллӣ
“Дар ҷараёни гуфтушунид ҳамчунин идома додани таҷрибаи пурсамари мубодилаи маълумоти фаврӣ ва муқовимати бевосита ба зуҳуроти номатлуби болозикр, аз ҷумла пешгирии таълимоти ғайрирасмии динӣ, андешидани чораҳои фаврӣ-ҷустуҷӯӣ, масъалаҳои расонидани ёрии ҳуқуқӣ оид ба парвандаҳои ҷиноятӣ, истирдоди ҷинояткорон, бозпас додани маҳкумшудагон ва дигар масоили муҳими соҳа мавриди муҳокима қарор дода шуданд.”, – омадааст дар хабар.
Дар ҳамин ҳол аз як наворе ба дасти Azda tv расид, ки тибқи иттилои манобеъ, маъмурони амниятии тоҷик ҳамроҳи кормандони сафорати Тоҷикистон дар Истанбул ду рӯз боз ба мадрасаҳо ва маконҳои омӯзиши Қуръон, ки бо иҷозати расмии ҳукумати ин кишвар фаъолият доранд, рафта, аз шаҳрвандони тоҷик акс мегиранд ва онҳоро бо истирдод шудан ба Тоҷикистон таҳдид мекунанд.
Як манбаи дигар афзуд, ки аллакай баъзе аз фарзандони тоҷикро аз ин маконҳои омӯзиши Қуръон боздошт ва ба Тоҷикистон истирдод кардаанд. Вале то ҳанӯз сиҳати ин хабар тасдиқ нашудааст.
Ба гуфтаи яке аз огоҳони умур, мақомоти Додситонии Тоҷикистон дар ин сафараш ба Туркия бештар талош доранд он нафаронеро, ки дар кишвар нисбаташон бо иттиҳомоти сохта парванда боз кардаанд, ба Ватан баргардонанд. “Ва масъалаи дигаре, ки Ҳукумати Тоҷикистонро бештар нигарон кардааст, ин афзоиши сафи донишомӯзони тоҷик дар мадориси исломӣ маконҳои таҳфизи Қуръон дар Туркия мебошад. Мақомот талош доранд, пеши ин равандро бигиранд, ҳамон гунае ки дар Тоҷикистон карданд.”, – мегӯяд мусоҳиби мо.
