Як сохтмончии калони ширкати “Имдоди Ғайрат” ҳангоми сохтмони мактабҳои миёна аз 5 мактаб зиёда аз 600 ҳазор сомониро бардурӯғ азонихуд кардааст.
Тавре Агентии назорати давлатии молиявӣ ва мубориза бо коррупсияи Тоҷикистон рӯзи 22-уми майи соли ҷорӣ хабар дод, ин “усто”-и калони ширкати мазкур бо номи Асилов Беҳруз Рустамович ҳангоми фаъолияти корияш дар корҳои сохтмонӣ “дар Муассисаҳои таҳсилоти миёнаи умумии №57, №78, №126, №128 ва №129-и ноҳияи Фирдавсии шаҳри Душанбе бо мақсади тасарруфи молу мулки ғайр бо роҳи сохтакорӣ маблағи умумии 616218 сомониро барзиёд ҳисоб карда, онро азонихуд намудааст.“
Гуфта мешавад, ҳоло Асилов боздошт шуда, алайҳи ӯ бо 4 модда (моддаҳои 245 қисми 3 банди “а”, 340 қисми 2 банди “а”, 260 қисми 1 ва 363)-и Кодекси ҷиноятии Тоҷикистон парвандаи ҷиноӣ боз шуда, тафтишот аллакай ба поён расида ва он ба додгоҳ фиристода шудааст.
Аксари моддаҳои зикршуда дар алоҳидагӣ аз ду то ҳашт соли зиндонро барои муттаҳмон пешбинт мекунанд.
