Бино ба иттилои расмӣ, имрӯз, 29-уми майи 2023, ба муносибати пирӯзӣ дар даври дуюми интихоботи президентӣ дар Туркия Эмомалӣ Раҳмон ба Раҷаб Тайиб Эрдуғон “барқияи шодбошӣ” фиристодааст.
Президенти Тоҷикистон бо ирсоли ин барқияи шодбошиаш ба унвони Президенти Туркия гуфтааст: “Шуморо ба муносибати пирӯз гардиданатон дар интихоботи президенти Ҷумҳурии Туркия табрик ва таҳният гуфта, таманниёти неку самимии худро мерасонам.“
Эмомалӣ Раҳмон, ки дар 8 давра аз номзад шудан ба мақоми президентӣ дар Тоҷикистон дар интихоботҳои ношаффоф иштирок ва ба қавли нозирони хориҷӣ ва созмонҳои байналмилалӣ, аз тариқи тақаллуб ва дуздии овозҳо ба сурати ҳамеша дар даври якуми интихоботҳо бо “гирифтан”-и беш аз 83 овозҳо қудратро соҳиб шудааст, дар ин барқияи худ мегӯяд: “Натиҷаҳои ин чорабинии муҳими сиёсӣ боз як далели эътимоди ҷомеаи Туркия ба Шумо ва аз ҷониби он ба таври васеъ дастгирӣ ёфтани сиёсати созандаатон мебошад, ки ба рушди пойдори кишвар ва таҳкими нуфузу эътибори он дар арсаи байналмилалӣ нигаронда шудааст.”
Дар ин раванд, нахуст амири давлати Қатар ва баъди он раиси Ҳизби наҳзати исломии Тунис аз дохили зиндон ва сипас сарону кишварҳо ва шуморе аз раҳбарони ҳизбу ҳаракатҳои исломӣ ва ғайриисломӣ, Созмони Миллали Муттаҳид, Созмони ҳамкориҳои исломӣ ва ғайра баъди эълони натиҷаҳои интихоботӣ паёмҳои табрикотии худро унвонии Эрдуғон фиристоданд.
Гуфта мешавад, даври дувуми интихоботи президентӣ дар Туркия якшанбеи дирӯз, 28-уми майи соли 2023 баргузор шуд ва дар ин давра Раҷаб Тайиб Эрдуғон бо касби беш аз 52 дарсади оро дар баробари рақибаш Камол Кличдоруғлу баранда шуд.
