Мақомоти эронӣ мехоҳанд, ки дар наздиктарин фурсат бо ҷиддияти бештар вориди бозори тандурустӣ дар Тоҷикистон бишаванд ва саҳми худро аз ин бозор бигиранд.
Баҳром Айнулилоҳӣ, вазири беҳдошт, дармон ва омӯзиши пизишикии Эрон дар шаҳри Душанбе гуфт: “Ба зудӣ шуъбае аз Донишгоҳи улуми пизишкии шаҳид Биҳиштӣ дар Тоҷикистон таъсис дода мешавад.”
Вазири эронӣ мегӯяд, қарор аст бо сармоягузории давлати Тоҷикистон як донишгоҳ таъсис дода шавад ва тамоми омӯзгорони он аз тарафи Эрон таъмин шавад.
Ба гуфтаи Айнулилоҳӣ, тайи ин сафар байни Вазорати тандурустӣ ва ҳифзи иҷтимоии Тоҷикистон ва Вазорати беҳдошт, дармон ва омӯзишҳои пизишкии Эрон як тафоҳумномае ба имзо расидааст, ки бар асоси он Эрон метавонад ба Тоҷикистон бо қимати муносиб дору содир кунад.
Вай афзуд: “Бар асоси ин тафоҳумнома давлати Тоҷикистон бозори доруии Эронро ба расмият мешиносад ва аз ин пас бозори доруии хубе дар ин кишвар пеши рӯйи Эрон хоҳад буд.”
Эрон дар ҳоле бо ҷиддият дар бозори тандурустӣ ва ба хусус бозори доруии Тоҷикистон ворид шудан мехоҳад, ки дар ин самт аллакай кишварҳои Русия, Покистон ва Ҳиндустон мавқеи худро хеле мустаҳкам кардаанд. Саҳми аз ҳама зиёдтарро дар ин бозор ширкатҳои мансуб ба духтарон ва домодҳои Эмомалӣ зери даст доранд.
Гуфта мешавад, вазири беҳдошт, дармон ва омӯзишҳои пизишкии Эрон дар раъси як ҳайати расмӣ 16-уми моҳи ҷорӣ вориди Тоҷикистон шуда ва 17-уми июли соли равон дар меҳмонхонаи “Ҳайат Реҷенси”-и шаҳри Душанбе бо вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода мулоқот кард.
Ба гуфтаи Вазорати тандурустӣ ва ҳифзи иҷтимоии аҳолии Тоҷикистон, “дар мулоқот ҳамзамон Сафири Ҷумҳурии Исломии Эрон дар Ҷумҳурии Тоҷикистон, масъулини бахшҳои гуногуни соҳаи тандурустии ин кишвар, муовинони вазири тандурустӣ ва ҳифзи иҷтимоии аҳолии Ҷумҳурии Тоҷикистон ва сардорони як қатор раёсатҳои зерсохтори вазорат иштирок намуданд.”
