Русия ба Тоҷикистон 8 системаи падофанди дифоъи ҳавоии С-300-ро таҳвил дод. Дар ин бора худи раисҷумҳури Русия Владимир Путин рӯзи 23-уми ноябр эълон кард.
Владимир Путин зимни мулоқоте бо аъзои ҳукуматаш аз сафари Раҳмон ба Маскав гузориш дода, онро хуб арзёбӣ кард. Ӯ зимнан ишора кард, ки Русия дар чаҳорчӯби иҷоди системи муштараки дифоъи ҳавоии кишварҳои узви Созмони Паймони Амнияти Дастаҷамъӣ (СПАД) ба Тоҷикистон ҳашт системи С-300 додааст.
“Мо аллакай ду бастаи системаҳои зиддиҳавоии С-300-и худро ба Тоҷикистон интиқол додем. Инҳо ҳашт дастгоҳи партобкунанда мебошанд”, – шарҳ дод ӯ.
Бояд гуфт, ки худи имрӯз, 23 ноябр дар Минск нишасти сарони кишварҳои узви СПАД ҷараён дорад ва гуфта мешавад, дар он масъалаи ташкили системаи ягонаи дифоъи ҳавоии кишварҳои узви СПАД баррасӣ мешавад. Ва Русия ҳам таъкид карда, ки дар чаҳорчӯби ин раванд кишвараш ба Тоҷикистон ин сомонаи дифоъиро таҳвил додааст.
Путин дар мулоқот бо аъзои ҳукуматаш таъкид карда, ки масъалаи интиқоли боқимонда аз сомонаҳои дифоъи ҳавоии С-300-ро ба Тоҷикистон то охири ҳамин сол ба анҷом расонанд.
Ёдовар мешавем, ки 21-уми ноябр Эмомалӣ Раҳмон бо сафари расмие вориди Маскав шуд ва бо Путин мулоқот кард. Нахуст гуфтушуниди дуҷониба сурат гирифт ва сипас машваратҳо бо иштироки ҳайатҳо идома ёфт, ки дар натиҷа бастае аз санадҳои аҳмкории ду кишвар ба имзо расид.
Ба гуфтаи бархе таҳлилгарон, Русия пас аз шуруъи ҳамлаҳояш ба Украина ва рӯбарӯ шудан ба таҳримҳои Ғарб, дар чорчӯби СПАД талош дорад байни кишварҳои аъзо як системаи дифоъи низомии ягона дар муқобили Ғарб эҷод кунад.
