Додситонии кулли Тоҷикистон парвандаи гумонбарон дар қатли муовини раиси “Ориёнбонк” Шуҳрат Исматуллоевро пас аз поёни таҳқиқ ба Додгоҳи олии кишвар фиристод.
Як манбаъ аз Додгоҳи олӣ ба Радиои Озодӣ рӯзи 27-уми ноябр тасдиқ карда, ки парвандаҳоро дастрас кардаанд, вале то ҳол рӯзи баррасии мурофиаҳо эълон нашудааст. Аммо, ба гуфтаи манбаъ, “Аввали моҳи декабр шурӯи мурофиаҳои додгоҳӣ дақиқ хоҳад шуд.”
Гуфта мешавад, мақомот то ҳол 14 нафарро бо гуноҳи даст доштан дар ҷинояти рабудану қатли муовини Ҳасан Асадуллозода, раиси “Ориёнбонк” боздошт кардааст. Аммо, раванди мурофиаҳо пушти дарҳои боз мегузарад ё баста марълум нест.
Ин дар ҳолест, ки 24-уми ноябри соли ҷорӣ Додситонии кулли Тоҷикистон дар посухи катбӣ ба “Азия-Плюс” гуфта буд: “пас аз тафтиши пурра ва холисонаи ҳолати кор парвандаи ҷиноӣ нисбат ба 14 айбдоршаванда, аз ҷумла Саидмуродов Дилшод (Маъруф ба Дилшоди СБ) санаи 18.11.2023 бо тасдиқи фикри айбдоркунӣ барои моҳиятан баррасӣ намудан ба Суди олии Тоҷикистон ирсол карда шуд.”
Ёдовар мешавем, ки 23 июни соли 2023 хабари рабуда шудани муовини раиси “Ориёнбонк” Шуҳрат Исматуллоев расонаӣ шуд. Ин хабар аз ҳама хабарҳои пурсарусадо дар соли ҷорӣ буд. Мақомот пас аз ҷустуҷӯи зиёд 12-уми август тавонистанд ҷасади Шуҳратро аз мавзеи Саразми Панҷакент пайдо кунанд.
Мақомот дар робита ба рабудан ва куштани Шуҳрат, Дилшод Саидмуродов, Акбар Ахмедов, Рустам Ашӯров, ки баъдан дар фурӯдгоҳи Молдова кушта шуд, Шоҳрух Хӯҷаев, Бахтовар Сафаров ва чанд нафари дигарро гумонбар дониста, алайҳи онҳо парвандаи ҷиноятӣ кушод. То ҳол назари гумонбарон дастраси расонаҳо нашудааст ва маълум нест то куҷо ба даст доштани худ дар ин ҷиноят эътироф мекунанд.
