Раёсати корҳои дохилӣ дар шаҳри Душанбе аз боздошти марде, ки навраси ноболиғеро дар ноҳияи Синои пойтахт шиканҷа карда буд, хабар дод.
Рӯзи сешанбе, 5-уми декабри соли 2023 Раёсати Вазорати корҳои дохилӣ дар шаҳри Душанбе аз боздошти марде, ки навраси ноболиғеро бо “электрошокер” шиканҷа ва латтукӯб карда буд, хабар дод.
Ба қавли манбаъ, “аз ҷониби кормандони милитсия вобаста ба ин ҳодиса Қудратуллозода Фирдавс Қудратулло, соли таваллудаш 2005, зода ва истиқоматкунандаи шаҳри Душанбе, ноҳияи Сино, кӯчаи Биниҳисорак-75/2, дастгир гардид.”
Ба гуфтаи мақомоти корҳои дохилии шаҳри Душанбе, ҳангоми санҷиш муайян шуда, ки “писарбачаи ноболиғ Ҷалолов Асрор Қурбонович, соли таваллудаш 2008, истиқоматкунандаи ноҳияи И.Сомонӣ буда, бинобар сабаби он, ки қаблан дар назди дӯстонаш чанд маротиба шаҳрванд Қудратуллозода Фирдавсро дашномҳои қабеҳ додааст, номбурда ӯро дар назди мактаби миёнаи умумии № 70 интизор мешавад.”
Ҳамчунин дар идома гуфта мешавад, ки Фирдавс Қудратуллозода ноболиғ Асрор Ҷалоловро “барои суҳбат ба болои боми биноҳои “Қайроққум”-и пойтахт даъват намудааст, ки дар онҷо байни онҳо муноқишаи лафзӣ ба амал омада, дар натиҷа шаҳрванд Қудратуллозода Фирдавс ноболиғ Ҷалолов Асрорро латукӯб намуда, чанд маротиба бо таҷҳизоти барқӣ (электрошокер) ба баданаш задааст.”
Вазорати корҳои дохилӣ дар бораи куҷо кор кардан ё собиқаи кор доштани Фирдавс Қудратуллозода ҳеч маълумоте иро накардаанд, аммо дар хабар таъкид шудааст, ки “вобаста ба ин ҳодиса аз ҷониби кормандони милитсия барои оғоз намудани парвандаи ҷиноятӣ маводҳои зарурӣ тартиб дода шуда, санҷиш идома дорад.”
Гуфта мешавад, навори шиканҷа ва латтукӯби ин наврас мавҷи вокунишҳои тундеро дар ҷомеа ба вуҷуд оварда, корбарон аз мақомоти корҳои дохилӣ ва дигар ниҳодҳои расмӣ талаб карда буданд, ки қазияро пайгирӣ ва омили ин ҷиноятро боздошт ва ӯро “ба ашадди муҷозот” гирифтор намоянд, то барои дигар ибрат шавад.
Бо вуҷуди он ки Вазорати корҳои дохилӣ дар бораи боздошти омили ин ҷиноят хабар дода, навраси ноболиғи ҷабрдидаро ба додани “дашномҳои қабеҳ” муттаҳам кардааст, то замони нашри ин матлаб, назари ҷониби ҷабрдида ва ё наздикону пайвандон ва адвокати вай дар расонаҳо нашр шудааст.
Аз сӯи дигар, бархе коршиносон бар ин боваранд, ки эҳтимол меравад мақомоти корҳои дохилӣ бо муттаҳам кардани ҷабрдида Асрор Ҷалолов, ки гӯиё “дашномҳои қабеҳ” дода бошад, қасди сабуктар кардани ҷазо барои Фирдвас Қудратуллозодаро дар сар доранд.
