Сомонаи расмии Ҳукумати Италия бо нашри хабари кӯтоҳе аз мулоқоти сарвазири Итолиё бо Президенти Тоҷикистон Эмомалӣ Раҳмон дар Рум иттилоъ додааст.
Дар хабар омада, ки мулоқоти Сарвазири Италия хонум Ҷорҷия Мелонӣ бо Президенти Ҷумҳурии Тоҷикистон Эмомалӣ Раҳмонов рӯзи 23-уми апрели соли 2024 дар дафтари кории сарвазир (Palazzo Chigi) баргузор хоҳад гашт.
Нуктаи ҷолиби таваҷуҳ он аст, ки Ҳукумати Италия раисҷумҳури Тоҷикистонро бо насаби “Раҳмонов” муаррифӣ кардааст ва маълум нест, ин паёми хоссе дорад ё натиҷаи сатҳи савод ва фаъолиятҳои дипломатҳои тоҷик мебошад, ки бо гузашти як даҳа аз тағйири насаби Эмомалӣ ҳамоно ӯро дар Аврупо ба “Раҳмонов” мешносанд.
Чанд рӯз пеш AZDA.TV бо нашри хабаре аз сафари эҳтимолии Эмомалӣ Раҳмон ба Италия иттилоъ дода буд, аммо ҷузъиёт ва макони сафар маълум набуд ва инчуни то лаҳзаи нашри ин хабар расонаҳои давлатии Тоҷикистон сафари Раҳмон ба Италияро таъйид ва ё рад накардаанд. Ҳукумати Раҳмон талош мекунад сафарҳои аврупоии ӯро аз тарси тазоҳуроти мухолифин то охирон лаҳза пинҳон дорад.
Ин дарҳолест, ки мақомоти амниятии Тоҷикистон чанд моҳи ахир пайваста пайвандони фаъолони тоҷикистонии муқими Аврупоро дар дохили кишвар бозпурсӣ карда ва ба онҳо ҳушдор доданд, ки дар ҷараёни сафари Эмомалиӣ Раҳмон ба Аврупо дар тазоҳуротҳои зидди ӯ ширкат накунанд ва дар сурати ширкати пайвандони онҳо дар чунин тазоҳурот хешовандони онҳо дар Тоҷикистон муҷозот хоҳанд шуд.
Ёдовар мешавем, ки мухолифини тоҷики муқими Аврупо қаблан дар ҷарёни сафарҳои Эмомалӣ Раҳмон ба Чехия, Швейтсария, Фаронса ва Олмон тазоҳурот баргузор карда буданд. Аз ҷумла, дар сафари охири Раҳмон ба Берлин ба корвони мошинҳои ӯ тухм партоб шуд ва ин боиси хашми мақомоти тоҷик гашт ва пайвандони мухолифнро дар дохили Тоҷикистон зери фишори сахт қарор доданд.
Ва ҳоло мухолифини тоҷики муқими Аврупо дар Фейсбук навиштаанд, ки ин бор низ барои сафари Эмомалӣ Раҳмон ба шаҳри Руми Итолиё барномарезӣ доранд.
