Тоҷикистон барои иҷрои бархе барномаҳои худ аз давлати Чин 300 миллион пул кумаки бебозгашт хостааст.
Бино ба иттилои расонаҳо, Ҳукумати Тоҷикистон барои иҷрои тарҳҳои мухталиф аз давлати Чин 300 миллион юан (ҳудуди 40,7 миллион доллар) кумаки бебозгашт дарёфт хоҳад кард.
Ба қавли манбаъ, 5-уми июли соли ҷорӣ вақте раиси ҷумҳури Чин бо сафари дурӯза вориди Тоҷикистон шуда буд, ҳукумати Эмомалӣ Раҳмон чунин дархости кумакҳоро аз мақомоти Чин карда буд.
Пеш аз ин Хадамоти матбуоти Эмомалӣ Раҳмон ҳам дар бораи имзои шудани чанд созишнома байни Тоҷикистон ва Чин хабар дода буд, вале он замон дар бораи ҷузъиёти ин кумакҳо ва дигар дархостҳои Душанбе аз Пекин ва ҷузъиёти онҳо чизе гуфта нашуда буд.
Ҳамзамон зикр шудааст, ки тибқи талаботи ин санадҳо баҳисобгирии муҳосибӣ тибқи қоидаҳои Бонки давлатии рушди Чин бояд сурат бигирад ва мунтазам вазъи ҳисобҳо ба ҳукуматҳои ҳарду кишвар гузориш дода шавад.
Гуфта мешавад, дар бораи кай ва дар кудом рӯзу моҳ ин маблағҳоро Тоҷикистон таҳвил бояд бигирад, чизе гуфта нашудааст, аммо таъкид гардида, ки ин маблағҳоро Бонки давлатии рушди Чин ба Бонки миллии Тоҷикистон бо юани чинӣ интиқол медиҳад.
Тибқи оморҳои расмӣ, дар маҷмӯъ Тоҷикистон 38,2 дарсад аз ҳаҷми умумии кумакҳои башардӯстонаи хориҷиро аз Чин дарёфт кардааст. Чин дар байни дигар давлатҳо дар ирсоли кумакҳои башардӯстона ба Тоҷикистон ҷои аввалро ишғол кардааст.
