Зубайдуллоҳи Розиқ, зиндонии сиёсӣ ва узви Раёсати олии Ҳизби наҳзати исломии Тоҷикистон аз бемористони Сарраёсати ислоҳи ҷазои ҷиноӣ мураххас шудааст.
Ӯ дар аввали моҳи август ба иллати бемории қалб дар бемористон бистарӣ шуда буд ва 11-уми сентябри соли ҷорӣ боз ба утоқаш дар зиндони шаҳри Ваҳдат интиқол ёфтааст.
Ин дар ҳолест, ки вазири адлияи Тоҷикистон Музаффар Ашӯриён зимни нишасти матбуотӣ иддао карда буд, ки Зубайдуллоҳи Розиқ бемор нест.
Аммо Ҳисомиддин Розиқов, писари ин маҳбуси 82-сола дар суҳбат бо Радиои Озодӣ иддаои вазири адлияро рад карда гуфта буд, “дар рӯзе, ки ӯ чунин изҳорот дод, падарам аз бародарам хостааст, ки доруҳояшро биёрад”.
Инчунин пайвандони Зубайдуллоҳи Розиқ гуфта буданд, ки ӯ то замони боздошт бемории қалб дошт ва дар соли 2015 як дафъа дилашро табобат кардааст.
Дар пайи расонаӣ шудани хуруҷи бемории қалби Зубайдуллоҳи Розиқ, Ҳисомиддин Розиқов дар суҳбат ба Azda.tv гуфта буд, ки мехоҳад бо назардошти бузургсолӣ ва бемории қалб доштани падараш ба мақомот, аз ҷумла раисҷумҳури Тоҷикистон нома навишта, озодии пеш аз муҳлати ин маҳбуси сиёсиро дархост кунад.
Гуфта мешавад, Зубайдуллоҳи Розиқ ҳамроҳи дигар маҳбусони сиёсӣ, аз ҷумла Раҳматуллоҳи Раҷаб, Ҳикматуллоҳ Сайфуллоҳзода ва Муҳаммадалии Файзмуҳаммад ҳанӯз соли 2021 дар номае аз раисҷумҳури Тоҷикистон хоста буданд, ки барои бозбинии парвандаашон “дар ҳузури коршиносону нозирони байналмилалӣ ва рӯзноманигорони дохиливу хориҷӣ” мусоидат кунад, вале ба ҷойи посухи мусбат болои ин маҳбусони сиёсӣ фишор оварда, дар утоқи ҷаримавӣ ҷой карда буданд.
Ёдовар мешавем, ки Зубайдуллоҳи Розиқ ҳамроҳ бо 12 узви дигари Раёсати олии ҲНИТ моҳи сентябри соли 2015 аз ҷониби мақомотт Тоҷикистон боздошт ва бо иттиҳомҳои сохта барои 25 сол равонаи зиндон гардид.
Созмонҳои байналмилалӣ, аз ҷумла СММ борҳо аз мақомоти Тоҷикистон раҳоии беқайду шарти ӯ ва ҳамраҳонашро хоста буданд, аммо мақомот ин талаби созмонҳоро ҳамеша нодида гирифтааст.
