Агентии омори Тоҷикистон гуфта, ки имсол ҳаҷми истеҳсоли гӯшти гову гӯспанд дар Тоҷикистон беш аз 10% зиёдтар шудааст.
Бино ба иттилои расмӣ, Агентии омори Тоҷикистон хабар дода, ки “дар моҳҳои январ — августи соли 2024 ҳаҷми истеҳсоли гӯшти чорвои калон ва майда (дар вазни зинда) дар ҳамаи категорияҳои хоҷагиҳо 148 801 тоннаро ташкил намуд, ки нисбат ба ҳамин давраи соли 2023 10,8 фоиз зиёд мебошад.”
Ба қавли манбаъ, “дар ин давра саршумори гӯсфанду буз 7,06 миллион сарро ташкил дода, 463,1 ҳазор сар ё 7,0 фоиз афзудааст. Аз саршумори умумӣ 93,4 фоизи саршумори чорвои калон ва 81,5 фоизи саршумори гӯсфанду буз ба хоҷагиҳои аҳолӣ рост меояд.”
Ин омори расмӣ дар ҳоле нашр мешавад, ки дар ин шабу рӯз нархи гӯшти гову буз ва гӯсфанд нисбат ба ҳамин давраи соли гузашта беш аз 25% гаронтар шудааст. Ҳоло 1 кг гӯшти гов дар бозорҳои шаҳру ноҳияҳои Тоҷикистон ҳудуди 100 сомонӣ ва 1кг гӯшти бузу гӯсфанд ҳам то 110-120 фурӯхта мешавад.
Инчунин бо таваҷҷуҳ ба камбуди гӯшт ва боло рафтани нархи он дар бозорҳои кишвар Тоҷикистон соли 2023 бо ширкати “Қайип ата”-и вилояти Туркистони Қазоқистон созишномаеро имзо кард. Тибқи ин созишнома бояд дар марҳилаи аввал 16 тонна гӯшти говро ба бозорҳои кишвар ворид кунад. Қарор аст то охири сол 110 тонна гӯшти гов ворид карда шавад.
Ба назари бархе коршиносон, Тоҷикистон метавонад аз нигоҳи таъмини сокинон ба гӯшт ва маҳсулоти гӯштӣ худкифо бошад, вале чун хеле аз чарогоҳҳо фурӯхта шудаанд ва рафту омади чорвои мардум ба чарогоҳҳо дар кӯҳҳо, теппаҳо ва дарраҳои кишвар низ маҳдуд карда шудаанд, таваҷҷуҳи мардум ба чорводорӣ низ хеле камтар шудааст. Ба ҳамин хотир, рӯз то рӯз талабот ба гӯшт ва маҳсулоти гӯштӣ дар кишвар зиёдтар шуда, нархи он дар бозорҳо қиматтар мешавад.
