Давлати Исроил Антонио Гутерриш, Дабири кулли Созмони Милали Муттаҳидро аз ворид шудан ба қаламрави худ манъ кард.
Бино ба иттилои расонаҳо, 2-уми октябри соли ҷорӣ Исроил Катс, вазири корҳои хориҷии Исроил Гутерришро ба “таассуб ва ё ғараз доштан алайҳи Исроил” муттаҳам намуд.
Ба қавли манбаъ, Катс дар як барномаи телевизионӣ изҳор дошт, “Ҳар касе, ки ҳамлаи шадиди Эрон ба Исроилро ошкоро маҳкум накунад, чунон ки қариб тамоми кишварҳои ҷаҳон маҳкум карданд, сазовори он нест, ки дар хоки Исроил қадам гузорад”.
Пас аз оғози ҳамлаҳои Исроил алайҳи Навори Ғазза, аъзои ҳукумати Исроил чандин бор мавқеъгириҳои Антонио Гутерриш, Дабири кулли Созмони Милали Муттаҳидро шадидан танқид карданд, ки дар баъзе мавридҳо ин вокунишҳо то ҳадди танишҳои лафзӣ пеш рафтанд.
Гуфта мешавад, мавқеъгириҳои Антонио Гутерриш дар бораи фаъолияти Агентии кӯмакрасонӣ ба оврагони фаластинӣ (UNRWA), таъкид бар “ҳуқуқи фаластиниён барои бунёди кишварашон”, масъалаи расонидани кумак ба Навори Ғазза ва “дар давоми 12 моҳ хориҷ шудани Исроил аз сарзаминҳои ишғолии Фаластин” аз ҷумлаи сабабҳои афзоиши ин танишҳо маҳсуб мешаванд.
