Бино ба гузориши Flightglobal, ширкати ҳавопаймоии “Сомон Эйр”-и Тоҷикистон қарордоди харид аз ҳавопаймоҳои Boeing 737 MAX 8-и ширкати “Боинг”-ро имзо кардааст.
Дар ҳоли ҳозир “Сомон Эйр” аз ҳавопаймоҳои Boeing-и 737-и 800 ва 737-и 900 истифода мекунад.
Манбаъ гузориш медиҳад, ки навъҳои Max 8-и ширкати ҳавопаймоии Boeing соли 2026 ба ширкати “Сомон Эйр” таҳвил дода мешаванд.
Абдулқосим Валиев, мудири кулли “Сомон Эйр” дар ин бора мегӯяд: “Бастани ин қарордод ҷузъе аз барномарезии дарозмуддати мо аст, ки он аз ҷумлаи навсозӣ ҳавопаймоҳо ва боло бурдани кайфияти хидматрасонӣ ба муштариён аст.”
“Ин ҳавопаймоҳо ба оператор имкон медиҳанд то шабакаи парвозҳои худро вусъат бахшад, теъдоди парвозҳои худро зиёд кунад ва баҳрабардорӣ аз технологияҳои навин дар ихтиёрашон қарор мегирад”, – мегӯяд Валиев.
Ин шабака роҳҳои мустақим аз Тоҷикистон ба Олмон, Имороти Муттаҳидаи Арабӣ, Туркия, Чин, Қатар, Арабистони Саудӣ, Эрон, Ҳиндустон, Русия, Қазоқистон ва Узбекистонро шомил мешавад.
Гуфта мешавад, аз соли 2019 инҷониб ин ширкати ҳавопаймоии тоҷикистонӣ ба дунболи ба даст овардани 2 адад аз ҳавопаймоҳои “Boeing 737-и MAX 8” буд. Ин ширкат мехоҳад ҳавопаймоҳои кӯҳнашудаи Boeing 737 NG-ро иваз кунад. Пештар “Сомон Эйр” дар фикри харидани ҳавопаймоҳои арзонтар аз дигар ширкатҳо буд.
