Фирдавс Ҳаётзода, додситони навтаъйиншудаи ҳарбӣ гуфта, ки аз қонуншиканиҳо дар даъвати ҷавонон ба артиш ва судури ҳама гуна ҷиноят алайҳи сарбозон пешгирӣ шавад.
Вазорати мудофиаи Ҷумҳурии Тоҷикистон 3-уми марти соли 2025 дар ин бора хабар додааст.
Ба иттилои манбаъ, ҳафтаи пеш ҷаласаи Комиссияи даъватӣ барои мавсими баҳории ҷалби ҷавонон ба хидмати ҳарбӣ баргузор шуд. Масъулини Комиссия дар суҳбатҳояшон ба боло бурдани сифати раванди ҷалби ҷавонон ба артиш ва ҳамин тавр қавитар кардани тамомии соҳаҳои артиш таъкид карданд.
Ҳаётзода, додситони ҳарбии навтаъйиншудаи зимни суханрониаш талаб карда, ки аз роҳҳои ғайриқонунии ҷалби ҷавонон ба артиш пешгирӣ ва содиршавии ҳама гуна ҷиноят дар ин самт кам карда шавад.
Бо ин ҳол аз тафсилоти ин пешниҳодот ва тарҳи ба иҷро даровардани пешгирӣ аз амалҳои ғайриқонунӣ ҳангоми ҷалби шаҳрвандони ҷавон ба сафи Қувваҳои муаллаҳи кишвар чизе дастраси расонаҳо нашудааст.
Пешниҳодҳои мушобеҳ аз тарафи масъулон солҳост, ки барои беҳтаркунии раванди ҷалби ҷавонон ба артиш ироа мешавад, вале боз ҳам мақомот бо роҳи “сарбозшикор” ё ҳамон “облава” ҷавоноро дар кӯчаву бозор ва ҳатто назди мактабу донишгоҳҳо боздошт карда, зӯран ба мошинҳо савор карда, мебаранд. Ҳамасола дар мавсимҳои баҳорӣ ва тирамоҳӣ ин масъала яке аз мушкилоти асосии ҷомеа, махсусан ҷавонони ба синни хидмати ҳарбӣ боқӣ мондааст.
Дар Тоҷикистон бо зӯр бурдан ё шабона ба хонаҳо зада даромадани маъмурони комиссариятҳои ҳарбӣ аз роиҷтарин равиши ҷалби ҷавонон ба артиш аст. Ин амали мақомот солҳои ахир аз сӯи ҷомеаи Тоҷикистон ва таҳлилгарону созмонҳои ҳуқуқӣ мавриди интиқоди шадид қарор гирифта буд, аммо мақомот боз ҳам ин равиши худро бо роҳҳои нав ва фишорҳои бештар болои хонаводаҳо идома медиҳанд. Солҳои ахир маъмурони комиссариятҳои ҳарбӣ дар якҷоягӣ бо маъмурони амниятӣ ба хонаводаҳо ва волидайни ҷавонон таҳдид мекарданд, ки агар писарашонро оварда насупоранд, барқашонро хомӯш мекунанд.
Далелҳои саркашии ҷавонон аз хидмати ҳарбӣ дар артиш, ин хабарҳои нашршуда аз маргу мири сарбозон дар қисмҳои ҳарбӣ, бадрафторӣ ва калонтарсолорию шароити ғайри стандартӣ гуфта мешавад.
