Муовини раиси шаҳри Ҳисор Гулзода Сангалӣ Бурӣ аз ҷониби Ожонси зидди фасоди Тоҷикистон бо иттиҳоми ришва ва фасод боздошт шудааст.
Рӯзи панҷшанбе, 20-уми март як манбаъ бидуни зикри ном ба Azda TV гуфт, Ожонии зидди фасод муовини раиси шаҳри Ҳисорро аввалҳои моҳи март боздошт карда буданд, вале то ҳол хабари боздошташ расонаӣ нашудааст.
Ба иттилои манбаъ, Гулзода “бо гирифтани як миллион сомонӣ аз як сохибкори биносоз бо миёнаравии сардори Раёсати сохтмони ш.Хисор ва инчунин бо додани 15 хазордолари амрикоӣ ба кормандони Ожонсии зидди фасод боздошт шудааст.”
Манбаъ афзуд, ки Гулзода ҳамзамон раиси Комиссияи тақсимоти замин дар шаҳри Ҳисор буд ва мардумро барои гирифтани замин бисёр озор медод. “Ҳангоми тақсимоти замин шахрвандоро ба ҷон оварда буд.”, мегӯяд манбаъ.
Ҳамчунин манбаъ мегӯяд, Гулзода бо соҳибкор як миллион сомонӣ маслиҳат карда будаанд. Кормандони Ожонсии зидди фасод ҳангоми гирифтани 200 ҳазор сомонӣ Гулзодаро дастгир карда, нисбати ӯ ва сардори шуъбаи сохтмони шаҳрдорӣ бо моддаи 319 (гифтани пора аз сӯи шахси мансабдор) ва 320 (додани пора) парванда кушоданд.
Azda TV аз роҳҳои худ натавонист ин хабарро таъйид кунад. Ва ҳамчунин назари муттаҳам ва наздикони ӯ ва ё шаҳрдории Ҳисор дар ин маврид дастрас нест.
Тибқи маълумоте, ки дар сомонаи шаҳрдории Ҳисор нашр шудааст, гуфта мешавад, Гулзода Сангалӣ Бурӣ 12-уми январи соли 2025 ба ҳайси муовини раиси шаҳри Ҳисор таъйин шуда ва то ҳол дар ин симат кор мекунад.
