Эмомалӣ Раҳмон, раисҷумҳури худкомаи Тоҷикистон ва писараш Рустами Эмомалӣ, раиси Маҷлиси миллии Маҷлиси олии кишвар дар робита ба таркише дар Бандар Аббоси Эрон, ки боиси кушта ва захмӣ шудани садҳо нафар гашт, ба ҳамтоёни эрониашон номаи таслият равон кардаанд.
Раҳмонов дар номааш ба Масъуд Пизишкиён, раисҷумҳури Эрон аз “андӯҳи амиқ”-и худ гуфта, ба мардуми Эрон ҳамдардӣ ва таслият иброз кардааст ва “аз даргоҳи Худованд барои фавтидагон раҳмату мағфират ва барои ҳамаи маҷруҳон шифои комил” хостааст.
Инчунин Рустами Эмомалӣ низ бо навиштани номаи монанде ба раҳбари порлумони Эрон Муҳаммад Боқири Қолибоф изҳори ҳамдардӣ кардааст.
Ёдовар мешавем, ки 26-уми апрели соли ҷорӣ дар минтақаи вежаи иқтисодии бандари “Шаҳид Раҷоӣ”-и Ҷумҳурии исломии Эрон сӯхтори калон ва таркиши сахте рух дод, ки дар натиҷа 40 нафар ҷон бохта, 1241 нафари дигар ҷароҳатҳои вазнин бардошта, дар бемористон бистарӣ гаштаанд.
То ҳанӯз сабаби сар задани ин ҳодисаи маргбор маълум нест. Мақомоти Эрон сабабҳои сар задани сӯхтору таркишро таҳқиқ дорад ва рӯзи 28-уми апрелро мотами миллӣ эълон кардаанд.
