Навори бо тухм задани як талабаи мактаб дар ноҳияи Шаҳринав боиси вокунишҳои тунди корбарон шуд.
Наворе, ки ахиран дар шабакаҳои иҷтимоӣ паҳн шудааст, нишон медиҳад, ки як гурӯҳ хонандагон дар яке аз мактабҳои ноҳияи Шаҳринав ба сари ҳамсинфи худ тухм мезананд ва ба ҳоли ӯ механданд. Ҳодиса, ки ба гуфтаи корбарон, дар дохили синфхона дар рӯзи таввалуди яке аз талабаҳо рух додааст, мавҷи вокуниш ва норозигиро дар миёни корбарони фазои маҷозӣ ба бор овардааст.
Дар навор дида мешавад, ки ин амал дар ҳузури дигар талабаҳо сурат гирифта, ягон кас монеи он намешавад.
Як корбари интернет бо нигаронӣ дар зери ин навор навиштааст: “30 сол мактаб сохтему маърифат не”.
Як корбари дигар навишта, ки “Бо тухм задани якдигар дар рӯзи зодрӯз миёни талабаҳои мактаб муд шудааст.”
Ин бори аввал нест, ки чунин рафторҳои номуносиб ва таҳқиромез аз ҷониби хонандагон дар дохили муассисаҳои таълимӣ сабт ва нашр мегардад. Корбарон аз мақомот даъват доранд, ки ба тарбияи маънавии хонандагон таваҷҷуҳи бештар зоҳир намоянд ва нисбати чунин амалҳо чораҷӯӣ кунанд.
