Аҳмад Шаръ, раисҷумҳури Сурия рӯзи чоршанбе, 14-уми май дар Риёз пойтахти Арабистони Саудӣ бо раисҷумҳури Амрико Доналд Трамп мулоқот кард.
Рӯзи гузашта Трамп зимни суханронияш дар Форуми муштараки иқтисодӣ ва сармоягузории Амрико – Арабистони Саудӣ дар Риёз аз бардоштани таҳримҳои молии Сурия хабар дод. Ӯ гуфт, пас аз суҳбат бо Муҳаммад бин Салмон, шоҳзодаи Арабистони Саудӣ ва Раҷаб Тайиб Эрдуғон, раисҷумҳури Туркия таҳримҳо алайҳи Сурияро бекор кард.
Трамп гуфт: “Таҳримҳо бисёр ваҳшиёна ва боздорандаанд. Акнун вақти он расидааст, ки Сурия ба по хезад.” Ӯ ҳамчунин илова кард: “Ман фармон медиҳам, ки таҳримҳо алайҳи Сурия бардошта шаванд, то ба онҳо имкони рушд ва пешрафт дода шавад.”
Пас аз эълони бардоштани таҳримҳои Сурия аз ҷониби Трамп, рӯзи чоршанбе нишасти махсуси Амрико, Арабистони Саудӣ, Сурия ва Туркия баргузор шуд. Дар ин нишаст Раҷаб Тайиб Эрдуғон тариқи видеоӣ аз дур иштирок кардааст.
Дар ин нишаст бар иловаи раҳбарони кишварҳо, боз вазирони корҳои хориҷӣ низ ширкат кардаанд. Аммо гуфта мешавад, дар як мулоқоти ҷудогонае, ки Трамп бо Аҳмад Шаръ доштааст, паси дарҳои баста гузашта, расонаҳо ба он роҳ наёфтаанд.
Каролин Ливитт, сухангӯи Кохи Сафед дар шабакаи Х хабар дод, ки Трамп аз Аҳмад Шаръ чанд масъала, аз ҷумла масъалаи пайвастан ба Паймони Иброҳимӣ ва эътирофи давлати Исроилро талаб кардааст. Ҳамзамон сухангӯи Кохи Сафед навишта, ки масъалаи мубориза бо ДИИШ ва ихроҷи сарбозони хориҷӣ аз сафи қувваҳои мусаллаҳи кишварашро дархост намудааст.
Ба иттилои расонаҳо, Аҳмад Шаръ ҳам дар навбати худ дар робита ба таҳкими муносибатҳои дипломатии Амрико ва Сурия ва инчунин сармоягузории амрикоӣ ва коркарди фаровардҳои нафтиро барои рушди иқтисоди кишвараш баррасӣ кардааст.
Ба гуфтаи таҳлилгарони минтақа, то чанд моҳи пеш Амрико танҳо барои пайдо кардани макони Аҳмад Шаръ 10 миллион доллар ҷоиза таъйин карда буд, вале имрӯз бо Трамп дар Риёз мулоқот анҷом медиҳад ва дар паҳлуи раҳбарони кишварҳои дунё нишаста, мулоқотҳои расмӣ анҷом медиҳад. Ин ҳолатро таҳлилгарон баёнгари сиёсатдонӣ ва маҳоратҳои дипломатии раҳбари нави Сурия арзёбӣ мекунанд.
