Рӯзи 5-уми август қисме аз муштариёни “Бонки Душанбе Сити” аз кор накардани барномаи мобилӣ ва банкоматҳои ин бонк шикоят карданд.
Ба гуфтаи корбарон, на танҳо барномаҳои онлайнӣ фаъол набуданд, балки дастгоҳҳои пулпардоз (банкоматҳо) низ аз кор бозмонда буданд.
Яке аз шаҳрвандон дар Фейсбук ба роҳбарияти бонк навиштааст: “Ин чӣ бонкдорӣ аст?! Мардум дар ҳолатҳои таъҷилӣ бояд дастрасӣ ба пулашон дошта бошанд, на бо навиштаи “Извините, банкомат временно не работает” рӯ ба рӯ шаванд!”
Вай талаб кардааст, ки роҳбарияти бонк сабаби ин мушкилро расман шарҳ диҳанд, онро фавран бартараф созанд ва аз мардум узр пурсанд. Ин муштарии бонк инчунин таъкид мекунанд, ки бонкҳо бояд масъулияти бештар дошта бошанд, зеро мардум ба онҳо бовар карда, амонатҳои худро месупоранд.
Раҷаб Мирзо, рӯзноманигори шинохтаи тоҷик, низ дар вокуниш ба кор накардани банкоматҳо ва қатъи кори барномаи мобилии “Бонки Душанбе Сити” (ДС), дар як навиштаи кӯтоҳ, аз амалкарди ин бонк шадидан интиқод кардааст.
Ӯ навиштааст: “Бонки миллӣ ба Душанбе Сити мӯҳлат дод, ки дар муддати як моҳ камбудиҳояшро ислоҳ намояд. ДС чӣ кор кард? Тасмим гирифт Бонки миллӣ ва мизоҷҳояшро масхара намояд?”
Бонки “Душанбе Сити” дар посух ба интиқоди Раҷаб Мирзо навиштааст, ки ба қарори Бонки миллӣ эҳтиром мегузорад ва талош дорад дар муҳлати муайяншуда камбудиҳоро ислоҳ кунад. Гуфтааст, пешниҳодҳо ва танқидҳоро ба инобат гирифта, ба ҳар муштарӣ бо эҳтиром муносибат менамояд.
Ин бори аввал нест, ки шаҳрвандон аз кор накардани банкоматҳо, дастнорас будани маблағашон дар ҳолатҳои зарурӣ ва гум шудани пулҳояшон аз ҳисобашон дар ин бонк шикоят мекунанд.
