Иёлоти Муттаҳидаи Амрико сиёсати худро дар қиболи Афғонистон бознигарӣ мекунад ва қарор кардааст, ки ба Толибон мустақиман кумак нарасонад.
Ду мақоми баландпояи Вазорати хориҷаи Амрико ба Афғонистон Интернешнл гуфтанд, авлавияти асосии Вашингтон ду ҳадаф аст: пешгирӣ аз табдил шудани Афғонистон ба паноҳгоҳи террористон ва хотима додан ба дипломатияи гаравгонгирии Толибон.
Ин мақомдорони амрикоӣ вазъи кунунии Афғонистонро “фалокатбор” арзёбӣ карда, гуфтанд, ки ИМА барномаҳои марбут ба занону духтарони афғонро дастгирӣ мекунад, вале ба Толибон бевосита кумак нахоҳад кард. Ба гуфтаи онҳо, Толибон ҳуқуқи башарро поймол мекунанд ва ҳатто ба амалиёти наҷот пас аз заминларзаи ахир монеъ шуданд.
Иёлоти Муттаҳида ҳамчунин аз талошҳои Чин барои нуфуз дар Афғонистон ва бахусус дар соҳаи маъдан нигарон аст ва таъкид мекунад, ки таҳаввулотро бодиққат пайгирӣ мекунад.
Чанде пеш Доналд Трамп ба расонҳо изҳор дошт, ки нерӯҳои ИМА бояд пойгоҳи низомии Багромро дар Афғонистон бозпас бигиранд. Таҳлилгарон бар инанд, яке аз сабабҳое, ки Амрико мехоҳад ин пойгоҳи низомиро пас бигирад, ҷойгоҳи муҳими стратегӣ ва наздикии он ба минтақаҳои ҳассоси Чин ва инчунин пешгирӣ аз нуфузи Чин дар Афғонистон аст.
