Дар ҳудуди ноҳияи Тоҷикобод аз қаторкӯҳои Исмоили Сомонӣ порае аз як пиряхи бузург канда шуда, аз тариқи дара ба поён лағжидаст.
Тавре Вазорати мудофиаи кишвар хабар медиҳад, ҳодисаи мазкур 25-уми октябри соли ҷорӣ тахминан соати 11:00-и рӯз дар ҳудуди деҳаи Сафедоби ҷамоати деҳоти Қалъаи Лаби Оби ноҳияи Тоҷикобод рух додааст.
Бино ба гузориши ин ниҳод, дарозии ин пиряхи кандашуда ҳудудан ду километр буда, баландиаш 25 метр ва паҳнои он 150-200 метр аст.
Вазорат мегӯяд, хушбахтона, ин ҳодиса талафоти ҷониву хисороти ҷиддие надоштааст. Аммо ба гуфтаи мутахассисони тоҷик, “бар асари бориши боронҳои шадид ва такроран канда шудани пирях аз баданаи пиряхи бузург метавонад ба хоҷагиҳои деҳаи Гулрези ҷамаоти деҳоти Қалъаи Лаби Об хатар дошта бошад.”
Тибқи оморҳои расмӣ, дар Тоҷикистон 14 ҳазор пирях сабти ном шудааст. Аммо гуфта мешавад, аз ин шумор зиёда аз 1300-тои он пурра об шудаанд.
Ин ҳам дар ҳолест, ки Далер Ҷумъа, вазири энергетика ва захираҳои оби Тоҷикистон аввали моҳи октябри соли ҷорӣ дар нишасте дар шаҳри Остонаи Қазоқистон гуфт, ки пиряхҳои Тоҷикистон “бо суръати шадид об мешаванд”. Вазири энергетика таъкид кард, ки “дар асри 20 тақрибан 30 дарсади пиряхҳои Тоҷикистон об шудаанд.”
