Вазирони корҳои дохилӣ ва муҳоҷирати 18 кишвари аврупоӣ ба таҳияи механизми нави вокуниш ба ҳолатҳои фавқулода дар марзҳои берунии Иттиҳоди Аврупо мувофиқат карданд.
Ин механизм бозгардонии босуръати муҳоҷирон ва расонидани кумаки фаврӣ ба кишварҳоеро, ки бо афзоиши зиёди вуруди муҳоҷирон рӯбарӯ мешаванд, пешбинӣ мекунад.
Бино ба иттилои BILD, ин мувофиқа рӯзи 26-уми сентябр дар нишасти вазирони корҳои дохилӣ ва муҳоҷирати Аврупо дар Мюнхен ба даст омада, ташаббускори он вазири корҳои дохилии Олмон Александр Добриндт будаст.
Дар ин нишаст намояндагони 18 кишвари аврупоӣ ва комиссари Иттиҳоди Аврупо оид ба муҳоҷират Магнус Бруннер иштирок карданд. Испания, ки Сеута ба қаламрави он дохил мешавад, дар нишаст намояндаи вазоратии худро надошт.
Механизми пешниҳодшуда аз се бахши асосӣ иборат буда, механизми якум муайян кардани ҳолати буҳронӣ мебошад. Яъне, кишварҳои ИА мехоҳанд меъёрҳои ягонаеро муайян кунанд, ки тибқи онҳо ҳолатҳои фавқулода дар марзҳои берунии Иттиҳоди Аврупо эътироф карда шаванд.
Механизми дуюм бозгардонии босуръат буда, дар сурати расман эътироф шудани чунин ҳолат, бояд механизми махсус фаъол шавад, ки бозгардонии муҳоҷиронро тавассути тартиби тезонидашуда имконпазир кунад.
Сеюм — вокуниши фаврии “Frontex” буда, қарор аст механизми нави дастгирӣ таъсис дода шавад, ки тибқи он гурӯҳи фаврии Агентии аврупоии ҳифзи марз ва соҳил “Frontex” дар давоми 24 соат барои кумак ба кишвари узви ИА, ки бо вазъияти буҳронӣ дар марзи беруна рӯбарӯ шудааст, омода шавад.
Дар нишасти Мюнхен ҳамчунин масъалаи васеъ кардани нақши “Frontex” дар раванди бозгардонии муҳоҷирон баррасӣ шуда, пешниҳод шудааст, ки ин агентӣ дар ташкили равандҳои бозгашт дар кишварҳои транзитии берун аз ИА низ нақши бештар дошта бошад.
Кишварҳои аврупоӣ ҳамчунин идомаи музокирот дар бораи таъсиси марказҳои бозгардонӣ дар кишварҳои берун аз Иттиҳоди Аврупо, ки бо номи “Return Hubs” маъруфанд, баррасӣ карданд. Олмон дар ин масъала бо Австрия, Нидерландия ва Дания ҳамкорӣ хоҳад кард.
Ба гуфтаи Добриндт, рӯйдодҳои моҳи июл дар Сеутаи Испания зарурати вуҷуди чунин механизмҳоро бештар нишон доданд. Ёдовар мемешавем, ки дар охири моҳи июл беш аз 70 ҳазор нафар аз Марокаш ба Сеута ворид шуданд. Қисми зиёди онҳо баъдан баргаштанд ё бозпас фиристода шуданд, аммо ҳазорон муҳоҷир дар ин минтақа боқӣ монданд.
Бояд гуфт, дар ин марҳила сухан дар бораи қабули қонуни нави ИА барои ихроҷи оммавии муҳоҷирон нарафта, мақсади асосӣ таҳияи механизми муштаракест, ки дар сурати эътироф шудани вазъияти фавқулода дар марзҳои берунии ИА имкон медиҳад, вокуниш ва бозгардонии муҳоҷирон зудтар анҷом дода шавад.
*Frontex — ниҳоди Иттиҳоди Аврупо оид ба ҳифзи марзҳо ва соҳилҳост, ки ба кишварҳои узви ИА дар назорати марзҳои беруна, идоракунии муҳоҷират ва бозгардонидани муҳоҷирон кумак мекунад.
