Додгоҳи вилояти Суғд ду сокини шаҳри Исфараро бо иттиҳоми қатли Маннон Содиқов, соҳибкори 60-сола ва узви пешини Ҳизби наҳзати исломии Тоҷикистон, ба ҳабси умрбод маҳкум кардааст. Аммо наздикони марҳум аз ҳукми додгоҳ розӣ нестанд ва мегӯянд, ки дар ин қазия нафари дигаре низ даст дорад.
Радиои Озодӣ рӯзи 9-уми ноябр дар истинод ба як манбаи наздик ба додгоҳ навиштааст, ки ҳукми Эҳсон Бобоеви 31-сола ва Юсуф Шарифови 46-сола ҳанӯз дар нимаи моҳи октябр эълон шудааст.
Ба гуфтаи манбаъ, додгоҳ ин ду нафарро дар куштор ва чанд ҷинояти дигар гунаҳкор донистааст, аммо маҳкумшудагон ҳукмро ноодилона ва ҷазоро аз ҳад сангин хонда, барои бозбинии он ба Додгоҳи олии Тоҷикистон шикоят бурдаанд.
Наздикони Маннон Содиқов низ дар мурофиа ва рӯзи эълони ҳукм ҳузур доштанд, вале аз хулосаи додгоҳ онҳо низ розӣ нестанд.
Яке аз пайвандони марҳум, ки ба далели амниятӣ нахостааст номаш нашр шавад, гуфтааст, ки дар қатли Содиқов нафари дигаре низ нақш доштааст, аммо мақомот ӯро на боздошт кардаанд ва на ба мурофиа даъват кардаанд.
Пайвандони Содиқов қаблан низ аз эҳтимоли даст доштани нафари дигар дар ин куштор изҳори нигаронӣ карда буданд. Ба гуфтаи онҳо, марҳум ба ин шахс эътимод дошт ва хонавода мехост, ки нақши ӯ дар ҷараёни тафтишот ба таври ҷиддӣ санҷида шавад.
Ёдовар мешавем, ки ҷасади Маннон Содиқов моҳи майи соли ҷорӣ дар таҳхонаи як бинои нотамом дар деҳаи Чорбоғи шаҳри Исфара пайдо шуда буд. Пайвандонаш гуфта буданд, ки ӯ бо худ 100 ҳазор доллар дошт ва ният доштааст барои озод кардани писараш аз зиндон ба Душанбе сафар кунад.
Абдусалом Содиқов, писари марҳум, соли 2024 бо иттиҳоми фиристодани маблағ ба Муҳаммадиқболи Садриддин, мудири пойгоҳи “Ислоҳ” ва яке аз мухолифони ҳукумати Тоҷикистон, ба ҳафт соли зиндон маҳкум шуда буд. Ӯ чанде пас аз куштори падараш бар асоси қонуни афв аз маҳбас озод гардид.
Тибқи фарзияи тафтишот, Бобоев ва Шарифов ӯро бо ҳамин баҳона ба мошин савор карда, ба Исфара бурдаанд. Ба иттилои мақомоти тафтишотӣ, гумонбарон дар дохили мошин дастони Содиқовро баста, маблағи ҳамроҳашро гирифта, сипас ӯро бо корд зада куштаанд ва ҷасадашро дар таҳхонаи як бинои нотамом пинҳон кардаанд.
Бояд гуфт, Эҳсон Бобоев то моҳи январи соли ҷорӣ дар ниҳодҳои амниятии Тоҷикистон кор кардааст, аммо дар гузориши Вазорати корҳои дохилӣ дар бораи куштори Содиқов ба собиқаи кори ӯ дар ин ниҳодҳо ишора нашудааст.
