Бино ба хабарҳои расида, як тифли сесола аз шаҳри Турсунзода аз ҷониби амакаш таҷовуз шудааст, наздикони ин кӯдак ба Додгоҳ муроҷиат кардаанд, аммо парванда то охир баррасӣ нашуда ва ҷониби гунаҳкор ба ҷазо кашида нашудааст.
Зуля Раҳматова, як фаъоли тоҷик бо нашри муроҷиатномаи видеоии хешовандони ин кудаки таҷовузшуда аз Эмомалӣ Раҳмон ва Рустами Эмомалӣ кумак хоста, гуфтаанд, парвандаро зери назорати худ бигиранд то гунаҳкор беҷазо намонад.
Ба гуфтаи наздикони кӯдак, аввалҳои моҳи август ин ҳодиса рух додааст.
Хешовандони кӯдаки таҷовузгардида гуфтаанд, ки нафаре, ки кӯдакро таҷовуз кардааст, амаки ӯ буда, то ҳол дар озодӣ қарор дорад.
Чанде пеш Радио Озодӣ аз қавли амаки кӯдак навишта буд, “зери шиканҷа” гуноҳро ба гардан гирифт, аммо чӣ гуна ва дар куҷо шиканҷа шуданашро нагуфтааст. Ӯ мегӯяд, ки “хонаводаи келини собиқ хусумат дорад” ва дар ҳаққи онҳо бадгӯӣ мекунанд. Дар посух ба суоли он ки чӣ гуна кӯдак дар хонаи онҳо “хунрав” шудааст, гуфтааст: “Вай аз аввал ҳамин хел касал дошт, гурдаҳояш бемор буд ва баъзе вақтҳо чунин мешуд.”
Модари кудак чанде пеш ба Радиои Озодӣ гуфта буд, “се сол пеш бо ду кӯдак аз шавҳар ҷудо шудам, вале хонаводаи шавҳарам алимент медоданд ва ҳақ доштанд, кӯдаконро бубинанд. Аммаву амакаш рӯзи Иди Қурбон гуфтанд, ба тамошо мебаранд ва ман ҳам розӣ шудам. Як рӯз пас хусури собиқам занг заду гуфт, ки духтарам бемор аст. Рафта дидам, ки бемадор хобидааст ва беист хун меравад. Пизишкон гуфтанд, ба номуси духтарам дастдарозӣ шудааст ва ӯро чаҳор соат чарроҳӣ карданд.”
Рӯзи 4 сентябри соли равон Прокуратураи генералии Тоҷикистон хабар дода буд, ки як сокини ноҳияи Данғара, Абдуллоев Азизулло Назуруллоевич, ки соли 2017 дар хонаи истиқоматиаш ба номуси духтари ноболиғи худ таҷовуз карда буд, аз тарафи суди ноҳия барои 25 сол равонаи зиндон шуд. Коршиносон мегӯянд солҳои охир шумори ҷиноятҳои таҷовуз ба номуси духтарони ноболиғ аз сӯйи хонаводаҳои худ зиёд шунида мешавад, ки ин боиси фишори равонии аксари модарон гаштааст. Дар ин бора то ҳол назари ҷомеашиносон ва равоншиносон ба таври умум расонаӣ нашудааст.
