Хадамоти зиддиинҳисории назди ҳукумати Тоҷикистон баъди боло рафтани нархномаи таърифаҳои ширкатҳои мобилӣ, ки вокунишҳои зиёдро дар пай дошт, аз ширкатҳои мобилӣ даъват кардааст, ки ба мардуми камбизоат тарофаҳои арзон пешниҳод кунанд, то ҳол се ширкат даъвати хадамотро пазируфтаанд.
“Sputnik” Тоҷикистон аз қавли Акмал Ҷӯраев, сардори шӯъбаи танзими алоқаи барқии Хадамоти зиддиинҳисории Тоҷикистон навиштааст, “вақте тарофаҳои ширкатҳои мобилӣ боло рафтанд, дар расонаҳо ва сомонаҳои иҷтимоӣ бонги изтироб зада шуд ва Агентӣ тасмим гирифт, ин масъаларо бо ширкатҳои мобилӣ ба миён гузорад.
Акмал Ҷӯраев, сардори шӯъбаи танзими алоқаи барқии Хадамоти зиддиинҳисории Тоҷикистон гуфт: “Ширкатҳо дар аввал розӣ нашуданд, зеро ин таруфаҳо хароҷоти техникӣ, музди меҳнат, андоз ва дигар пардохтҳояшонро бароварда намекунанд. Мо расман ба онҳо муроҷиат намуда, хоҳиш, ҳатто илтимос кардем, ки барои мардуми камбизоат, донишҷӯён ва дигар қишрҳои аз лиҳози иҷтимоӣ осебпазир, бигзор, ки як фоизи муштариёни ширкатҳоро ҳам ташкил кунанд, таруфаҳои арзонро роҳандозӣ намоянд”.
Сардори шӯъбаи танзими алоқаи барқии Хадамот гуфтааст, ҳоло ширкати “Мегафон” тарофаҳоро ба 2 – сомонӣ, 5 – сомонӣ ва 7 – сомонӣ ба Хадамоти зиддиинҳисорӣ пешниҳод кардааст, ки мавриди омӯзиши мутахассисони ин ниҳод қарор дорад.
“Мо мебинем, ки оё ин таруфаҳо ба қонунгузории зиддиинҳисорӣ мувофиқат мекунанд ё хайр. Пас аз он ки қабул шуд, худи ширкат онҳоро ба мизоҷон эълон мекунад. гуфтааст Акмал Ҷӯраев.
Ширкатҳои “Z – mobile” ва “Вавилон” ҳам як чунин тарофаҳоро пешниҳод карданд. Масалан, “Z – mobile” тарофаеро пешниҳод кардааст, ки пардохташ сифр аст ва он барои мизоҷ имкон медиҳад, ки дар ҳоли зарурӣ аз мултибастаҳо инфиродӣ истифода кунад, аммо ҳамеша дар хат бошад”, – гуфтааст, Акмал Ҷӯраев.
Дар Тоҷикистон моҳи апрели соли равон ширкатҳои мобилӣ тарофаҳои худро боло бурда буданд, ки аз ҳама арзонаш 30 сомонӣ аст. Баъди боло бурдани нархи гуфтугуи мобилӣ ва интернет, дар шабакаҳои иҷтимоӣ норозигӣ аз тарафи шаҳрвандон шуда буд, ки дар он вақт гуфта мешуд, ширкатҳо ҳаққи мардуми камбизоат барои дастрасӣ ба алоқаи арзонро поймол мекунанд.
Хадамоти зиддиинҳисории назди ҳукумати Тоҷикистон аз ин тағйирот пуштибонӣ карда буд.
Хадамот гуфта буд, ки ширкатҳои мобилӣ барои пардохтҳои ҳатмӣ ба буҷаи давлат ҳудуди 40% – и даромади нохолиси худро харҷ мекунанд ва ин роҳи онҳоро ба сӯи ироаи хадамоти бокайфият душвор мекунад.
Бино ба иттилои Хадамоти алоқа дар Тоҷикистон, чор ширкати мобилӣ – Тсел, Вавилон, Мегафон ва “Z – mobile” фаъолият мекунанд, ки дар умум 6 миллиону 458 ҳазору 990 муштарӣ доранд ва 4 миллиону 856 ҳазору 887 нафари онҳо фаъол мебошанд.
