Фаромуз Иргашев ҳуқуқшиноси ҷавони тоҷик дар саҳифаи фейсбукии худ нисбати қазияи рӯзи 4 ноябр, ки кормандони БДА ва ОМОН дар шаҳри Хоруғ ба осмон тир холӣ кардаанд, вокуниш нишон додааст.
Иргашев менависад, рӯзи 4 ноябрb соли 2020 кормандони БДА ва ОМОН бинобар сабаби аз тарафи Зикилбеков С. гуё, ки ба талаботи қонуни онҳо итоат накардан ба ҳаво аз яроқи оташфишони тапонча ва Калашников тир холӣ кардаанд. Мақомот, гӯё барои ором намудани 15 “ҷавонони бағазабомада “ба ҳаво тир холӣ намудаанд, чун ин ҷавонон гӯё ба фаъолияти онҳо монеа эҷод карда бошанд.
Ба иддаои Иргашев асли кор дигар аст. Ӯ мегӯяд, ки 5-7 корманди милитсия, ки бо яроқи оташфишон ва дигар лавозимоти ҷангӣ мусаллаҳ буданд ба тарафи мошин ва одамон тир холӣ намудаанд. Кормандони милитсия мардумро дашномҳои қабеҳ намуда, шаъну шарафаи шаҳрвандонро паст задаанд! Фаромуз менависад, ки ҳам шоҳидони зинда ҳастанд ва ҳам далелҳо мавҷуданд.
Иргашев ин кори кормандони милитсияро ғайриқонунӣ хонда, мегӯяд, ки ин ҳодиса дар ҷойи аҳолинишин, дар ними шаб ва дар наздикии беморхона рух додааст ва яроки оташфишонро дар ҳолатҳои ниҳоӣ ва истисноӣ кормандони ҳифзи ҳуқуқ истифода менамоянд!
Фаромуз кормандони милитсияро бо ин амалашон ба он муттаҳам мекунад, ки барояшон муқаддасот, арзишҳо ва манфиатҳои миллату давлат – сулҳу субот, амнияти шаҳрвандон ва бехатарии давлат арзише надорад. Ин амалашон хатар барои амнияти давлат мебошад ва вазъияти минтақаро ноором месозаду ҳаёти шаҳрвандонро зери хатар мегузорад!
Иргашев дар охир ба роҳбарияти ВКД муроҷиат карда менависад, ки аз хоби гарон хезед ва ин рафтори кормандҳоятонро зери назорат гиред. Чун пагоҳ дер мешавад ва оқибати ин ҳама бедодгариҳо аз нархи ҷон гаронтар меафтад.
Ӯ мегӯяд, ки халқ барои Шумоён чорво нест ва нангу номус, ҳаёти хеш ва шаъну шарафи худро бо нархи ҷонаш ҳимоя мекунад! Дар хитоб ба милитсия Иргашев гуфта, ки чунин ҷасорататонро дар марз бо қирғизҳо яъне дар Ворух нишон диҳед ва онҳоро хонашерони майдонғариб меномад.
Номи Фаромуз Иргашев, ҳуқуқшиноси ҷавони тоҷик аз шаҳри Хоруғи ВМКБ замоне дар расонаҳо давр зад, ки ӯ аз ширкат карданаш дар интихоботи президентии 11 октябр дар Тоҷикистон хабар дод. Вале замони ҷамъоварии имзои шаҳрвандон барои сабти ном шудан, натавонист имзоҳои заруриро ҷамъоварӣ кунад ва бо ҳамин аз корзори интихоботӣ канор рафт.
