Бонки осиёии рушд (БОР) ба маблағи 237,5 млн доллар ба Тоҷикистон кумак кард. Ин кумакҳо барои татбиқи чор лоиҳа пешбинӣ гардидаанд.
Дафтари кории ин ниҳоди байнулмилалии молӣ дар Душанбе гуфтааст, созишномаҳои грантии дахлдор охири соли гузашта байни ҳукумати кишвар ва БОР ба тасвиб расидааст.
Гуфта мешавад, ин маблағ ҷиҳати баланд бардоштани устувории бахши энергетика, тақвияти бехатарӣ ва эътимоднокии шабакаи миллии роҳҳо, беҳбуди низоми обёрӣ ва таҳкими соҳаи молия ва идоракунии молиявӣ дар Тоҷикистон пешбинӣ гардидааст.
Ҳамчунин қайд мешавад, ки барои рушди соҳаи энергетика 105 млн доллар ҷудо гардида, ки ба раванди суръат бахшидан ба татбиқи ислоҳоти ҷорӣ дар соҳаи энергетика, беҳбуди баҳисобгирии чаканаи нерӯи барқ ва шабакаи тақсимоти ҷараёни пасту миёна дар ҳафт шаҳр ва пешбурди баробарии гендерӣ дар соҳаи энергетикаи Тоҷикистон равона мегардад.
Тибқи ин лоиҳа дар ҳаҷми 67,5 млн доллар барои таъмини роҳҳои Данғара то Оқмазор (28,7 км) ва аз Ҳулбук то Кангурт (59,5км) ҷудо гардидааст, ки роҳҳои ин манотиқи кишвар пурра таъмиру барқарор карда мешаванд.
Ҳамчунин зикр мешавад, ки аз ин кумакҳо ба маблағи 15 млн доллар барои идоракунии захираҳои обӣ дар ҳавзаи дарёи Панҷ ҷудо карда мешавад.
Зикр мешавад, 50 млн доллари дигар баҳри беҳбуд бахшидан ва сармоягузории бахшҳои молиявии хусусӣ ва афзоиши рушди онҳо ҷудо хоҳад шуд.
Бино ба маълумоти интишоргардида, Бонки осиёии рушд дар соли 2020 ба ҳукумати Тоҷикистон дар ҳаҷми 320 млн доллар кумаки молиявӣ расонидааст.
