Суди ҳарбии гарнизони Душанбе шаҳрванд Рустам Умбатов, духтур-мутахассиси бемориҳои асабро барои хунукназарияш ҷарима кард.
Бино ба иттилои сомонаи суди ҳарбии гарнизони Душанбе, Рустам Умбатов ба моддаи 322 Кодекси ҷиноятии Тоҷикистон, яъне хунукназарӣ айбдор мешавад.
Умбатов 3-юми апрели соли 2020 дар ноҳияи Шоҳмансури шаҳри Душанбе ба ҳайси табиб кор карда, сокини ҷавони пойтахт Парвиз Ҷалиловро, ки гирифтори бемории сутунмӯҳра будааст солим ва ба хизмати ҳарбӣ муносиб донистааст.
Гуфта мешавад, Ҷалиловро баъд аз ташхис, барои адои хидмати ҳарбӣ ба қисми ҳарбии 02615 Вазорати мудофиаи Ҷумҳурии Тоҷикистон фиристодаанд. Дар рафти адои хидмат бемории номбурда авҷ гирифта, ӯ барои муолиҷа ва табобат ба Госпитали марказии ҳарбии ВМ Ҷумҳурии Тоҷикистон фиристонида шудааст.
Ҳамин тариқ бо қарори суд Умбатов барои расонидани зарари ҷиддии маънавӣ ба Парвиз Ҷалилов, ҷарима карда шуд, ҳаҷми ҷарима дар хабар гуфта нашудааст.
