Дабири Шӯрои Амнияти Русия, Николай Патрушев талаб кард, ки сатҳи амният дар ҷойҳои иқомати муҳоҷирони корӣ беҳтар карда шавад.
Бино ба иттилои РИА Новости, котиби Шӯрои амнияти Русия, Николай Патрушев аз роҳбарони вилоятҳо ва мақомотҳои ҳифзи ҳукук инчунин аз хадамотҳои вижа талаб кард, ки сатҳи амният дар ҷойҳои будбош ва кори муҳоҷирони меҳнатӣ, бояд афзоиш дода шавад.
Вай қайд кард, ки вуруди густурдаи муҳоҷирони корӣ хатари афзоиши ҷурму ҷиноят ва ҳамчунин ба миён омадани даргириҳои қавмиву мазҳабиро зиёд мекунад.
«Аз роҳбарони вилоятҳо, сохторҳои қудратӣ ва хадамоти махсус хоҳиш мекунам, ки масъалаҳои пешгирии паҳншавии идеологияи радикалӣ дар байни муҳоҷирони хориҷиро зери назорати махсус гиранд», – таъкид кард, Патрушев дар ҷаласа оид ба назорати амният дар Русия.
Ӯ инчунин илова кард, ки риояи қонунҳои Русия барои муҳоҷирон ҳатмист ва бояд аз зуҳури бегонаситезӣ байни онҳо ҷилавгирӣ шавад.
Пештар муовини раиси Кумитаи амният ва мубориза бо фасоди Думаи давлатии Русия Анатолий Виборний пешниҳод карда буд, ки ба далели задухӯрдҳои зиёди оммавии муҳоҷирон дар ин кишвар ҷазоҳои маъмурӣ 5 маротиба бештар ва ё ҳукми аз Русия ихроҷ барои муҳоҷирон татбиқ карда шаванд, то ин падидаи номатлуб коҳиш ёбад.
