Гурӯҳи кории Созмони Миллали Муттаҳид дар умури боздоштҳои худсарона дар гузориши ахираш аз мақомоти Тоҷикистон хостааст, ки собиқ генерали Фронти халқӣ Ғаффор Мирзоевро аз зиндон озод карда ба ӯ ҷубронпулӣ пардохт кунад.
Гурӯҳи кории СММ мегӯяд, боздошт ва эълони ҳукми абад нисбати Ғаффор Мирзоев мухолифи қонунҳои худи Тоҷикистон буда, дар ин ҳукм чандин қонуни Тоҷикистон аз ҷониби мақомоти ин кишвар поймол шудааст.
Аммо мақомоти тоҷик мисли ҳамеша ин иддаои Гурӯҳи кории СММ-ро рад намуда, дар посух гуфтаанд, ки боздошту эълони ҳукми абад нисбати Ғаффор Мирзоев “мутобиқи қонунҳои Тоҷикистон анҷом шуда”, ҳеч қонуншикание вуҷуд надорад.
Вакили дифоъ Скотт Мартин, ки қазияи Мирзоевро моҳи августи соли 2020 ба унвонии СММ фиристодааст ба Радиои Озодӣ гуфта, ки “маҳрум кардани Мирзоев аз озодӣ хилофи Эъломияи умумии ҳуқуқи башар ва Паймони байнулмилалӣ оид ба ҳуқуқи шаҳрвандӣ ва сиёсӣ мебошад”. Ва бояд мақомоти Тоҷикистон “ӯро билофосила озод карда, ҷубронпулӣ бидиҳанд”.
Аммо ба гуфтаи коршиносон ба эҳтимоли зиёд ин дархости СММ-ро мақомоти Тоҷикистон нодида мегиранд. Чуноне, ки таҷриба нишон дода, мақомоти тоҷик ҳамеша талабҳои СММ дар мавриди бечунучаро озод намудани зиндониёни сиёсии аъзоёни ҲНИТ, Зайд Саидов, Маҳмадрӯзӣ Искандаров, Бузургмеҳр Ёров ва дигаронро нодида гирифтааст.
